ఉరుకుల పరుగుల జీవితంలో ఎవరి దారి వారిదే. పక్కవాళ్ల గురించి పట్టించుకునే సమయం, తీరికే ఉండదు. కానీ ఓ వ్యక్తి పక్షుల గురించి కూడా ఆలోచించాడు. వాటికోసం ఇంట్లో స్థలాన్ని కేటాయించాడు. రామచిలుకలతో బంధం పెంచుకున్నాడు. వాటికి మాటలు నేర్పాలని చూస్తున్నాడు.
పశ్చిమగోదావరి జిల్లా తాడేపల్లిగూడెంలోని సీనియర్ ఎలక్ట్రికల్ లైన్మెన్గా పనిచేసే దూదే వెంకటేశ్వరరావు విద్యుదాఘాతానికి గాయపడే పక్షులను చూసి బాధపడేవాడు. వాటికి రక్షణ కల్పించాలని మనసులో అనుకున్నాడు. తన ఇంట్లో ఆవాసాన్ని ఏర్పాటు చేశాడు. పరిసర ప్రాంతాల్లోని పొలాలకు వెళ్లి.. వరి కంకులు తెచ్చి వాటికి మేతగా వేస్తున్నాడు.
తొలినాళ్లలో 5 నుంచి 10 వరకు రామచిలుకలు వచ్చేవి. ఇప్పుడు 30 నుంచి 40 వరకు వచ్చి ఆహారం తింటున్నాయి. రామచిలకలు ఆహారం తీసుకుంటుంటే.. చిన్న పిల్లలు వచ్చి ఆనందంగా చూస్తున్నారని వెంకటేశ్వరరావు చెబుతున్నాడు. సాధ్యమైనంతవరకు ఆ పక్షులకు తన మాటలతో శిక్షణ ఇవ్వాలనుకుంటున్నాడు. తాను చేసే ఈ పనికి కుటుంబ సభ్యుల నుంచి మంచి తోడ్పాటు ఉందని వెంకటేశ్వరరావు వెల్లడించాడు.