పదేళ్లపాటు ప్రశాంతంగా ఉన్న గిరిజన ప్రాంతంలో ఇప్పుడు ఆందోళన వ్యక్తమవుతోంది. నెలరోజులుగా మాంగనీసు గనుల తవ్వకాలను వ్యతిరేకిస్తూ గిరిజన, రైతు సంఘాల నాయకులు ధర్నాలు, నిరసన కార్యక్రమాలు చేపడుతున్నారు. పర్యావరణ అనుమతులు లేవు కనుక లీజులను రద్దు చేయండని డిమాండు చేస్తున్నారు. అధికార పార్టీకి చెందిన నేత ఒకరు చక్రం తిప్పుతుండటంతో అధికారులు కూడా లీజుదారులకు వత్తాసు పలుకుతున్నారు. స్థానిక ఎమ్మెల్యే రాజన్నదొర మాత్రం గిరిజనుల అంగీకారం లేకుంటే గనుల తవ్వకాలు చేయొద్దని చెబుతున్నారు. గిరిజనులకు అన్యాయం జరగకుండా స్పష్టమైన ప్రకటన ఎమ్మెల్యే ఇవ్వాలని శిఖపరువు మైనింగ్‌ పోరాట సంఘ నేతలు కోరుతున్నారు
గిరిజనుల వ్యతిరేకత
శిఖపరువు అన్‌సర్వే భూముల్లో గనుల తవ్వకాలకు 2007, 2008లో ముగ్గురు దరఖాస్తు చేశారు. టి.నాగయ్యకు 9.350 హెక్టార్లు విస్తీర్ణంలో పరిశ్రమలు, వాణిజ్య శాఖ 2009 జూన్‌ 29న మాంగనీసు తవ్వకాలకు అనుమతులిస్తూ జీవో 161 జారీ చేసింది. పెద్ద తరహా ఖనిజ నియమావళి ప్రకారం 20 ఏళ్ల కాలపరిమితితో డిసెంబరు 23, 2029 వరకు లీజు ఇచ్చారు. అప్పట్లో తవ్వకాలకు లీజుదారులు ఏర్పాట్లు చేసుకున్నారు. పర్యావరణ అనుమతులకు ప్రజాభిప్రాయ సేకరణ చేయగా.. గిరిజనులు వ్యతిరేకించారు.
డబ్బులు ఎరజూపి
గిరిజనులను ఒప్పించి, పర్యావరణ అనుమతులు దక్కించుకునేలా అధికార పార్టీకి చెందిన నేత ఒకరు చక్రం తిప్పుతున్నట్లు తెలిసింది. గిరిజనులు, స్థానిక పెద్దలకు డబ్బులు ఎరజూపి పంచాయతీ తీర్మానంతో పాటు, ప్రజామోదం పొందేలా రూ.కోట్లాదిగా ఖర్చు చేస్తున్నట్లు కూడా ప్రచారం జరుగుతోంది. గిరిజనులను అక్కడి నుంచి ఖాళీ చేయించేందుకు పావులు కదుపుతున్నారని గిరిజన, రైతు సంఘ నాయకులు ఆగ్రహం వ్యక్తం చేస్తున్నారు.
బదలాయింపు
లీజుదారు తన లీజును వేరే వ్యక్తికి సబ్‌లీజు ఇవ్వడంతో ఆదేశాలు వెలువడ్డాయి. అప్పటి సాలూరు తహసీల్దార్‌ నిరభ్యంతర పత్రాన్ని ఇచ్చారు. సబ్‌లీజుదారు పర్యావరణ అనుమతికి దరఖాస్తు చేశారు. జనవరి 10, 2018న మళ్లీ కలెక్టర్‌, సంబంధితశాఖల అధికారులతో సమావేశం నిర్వహించారు. ప్రజాభిప్రాయ సేకరణ జరగాల్సి ఉంది.