కరోనాను జయించిన నెల్లిమర్ల డీటీసీ సెంటర్ నుంచి 32 మంది పోలీసు సిబ్బంది ఈ రోజు విధి నిర్వహణలో చేరుతున్నారని జిల్లా ఎస్పీ రాజకుమారి తెలిపారు. కొవిడ్ నుంచి కోలుకున్న పోలీస్ సిబ్బందికి శుభాకాంక్షలు తెలుపుతూ వారికి పండ్లు, శానిటైజర్లు అందజేశారు.
జిల్లాలోని వివిధ ప్రాంతాలకు చెందిన వీరికి కరోనా నిర్ధరణ అయినా వెంటనే డీటీసీ సెంటర్లో ఉంచడం జరిగిందని ఎస్పీ రాజకుమారి పేర్కొన్నారు. కరోనా నిర్ధరణ అయిన తమలో జిల్లా ఎస్పీ ధైర్యాన్ని నింపారని, అలాగే ఎప్పటికప్పుడు వైద్యులతో మాట్లాడి వ్యాధికి చికిత్స చేయించడంలో తోడ్పాటు అందించారని సిబ్బంది సంతోషం వ్యక్తం చేశారు. కరోనా నుంచి త్వరగా కోలుకోవడానికి సహకరించిన జిల్లా ఎస్పీకి వారు కృతజ్ఞతలు తెలిపారు.