ప్రకాశం జిల్లా ఒంగోలుకు చెందిన బెల్లంకొండ రాహుల్ ఓ ప్రయివేటు పాఠశాలలో ఐదవతరగతి చదువుతున్నాడు. తల్లి ప్రభుత్వ ఉపాధ్యాయురాలు కాగా...తండ్రి ఓ ప్రయివేటు సంస్థలో పనిచేస్తుంటాడు. బాహుబలి చిత్రంలో ప్రభాస్ ప్రత్యర్థులపై విసిరే బాణాలను చూసి స్ఫూర్తి పొందిన రాహుల్...తాను కుడా విలువిద్య నేర్చుకుంటానని తల్లిదండ్రులను కోరటంతో అందుకు అవసరమైన విల్లు, బాణాలను కొనిచ్చారు. దాంతో పాటు విజయవాడలో శిక్షణ కూడా ఇప్పించటంతో విలువిద్యలో నైపుణ్యం సాధించి ఎన్నో పతకాలను సాధించాడు.
రాహుల్ తదేక దృష్టితో విసిరే బాణం గురితప్పకుండా లక్ష్యాన్ని ఛేదిస్తుందనటంలో ఎలాంటి సందేహం లేదు. ఇప్పటివరకూ...రాష్ట్ర, జాతీయ స్థాయిలో అనేక పతకాలను సాధించాడు. ఇటీవల విజయవాడ, గోవాల్లో జరిగిన మినీ జాతీయ ఆర్చరీ పోటీల్లో ఐదు బంగారు,కాంస్య పతకాలు సాధించాడు. 10 మీ, 15 మీ లక్ష్యాలను సునాయాశంగా ఛేదిస్తున్న రాహుల్...అండర్ 11 కేటగిరిలో త్వరలో జరిగే జాతీయ స్థాయి పోటీలకు సిద్ధం అవుతున్నాడు. భవిష్యత్తులో ఆసియా, ఒలంపిక్స్ గేమ్స్లో భారత్ తరపున ఆడి రికార్డులు కొల్లగొడతానని ఆత్మవిశ్వాసంతో ముందుకెళ్తున్నాడు. నిరంతర కృషితోనే అనుకున్నది సాధించవచ్చని చెబుతూ...పలువురికి స్ఫూర్తిగా నిలుస్తున్నాడు.