చినుకు పడితే చిత్తడి... మంత్రి నియోజకవర్గంలో దుస్థితి

శివారు కాలనీల నిర్మాణం జరిగి దశాబ్దాల కాలం గడిచిన రోడ్ల నిర్మాణం గురించిపట్టించుకున్న దాఖలాలు లేవు. వర్షం పడితే ఇళ్ల మధ్య ఏదైనా నది ప్రవహిస్తుందన్న ఆలోచన కలుగుతుంది అక్కడ పరిస్థితి చూస్తే. పేరుకు నగరపాలక సంస్థ అయిన సీసీ రోడ్లు కనబడవు.

వై.ఎస్ రాజశేఖర్ రెడ్డి ముఖ్యమంత్రిగా ఉన్న కాలంలో ఒంగోలు కొత్తపట్నం మార్గంలో ప్రస్తుత జాతీయ రహదారి వద్ద రాజీవ్ కాలనీ, ఇందిరమ్మ కాలనీ, జర్నలిస్ట్ కాలనీలు ఏర్పడ్డాయి. ఇంటి నిర్మాణాలు అయితే పూర్తయ్యాయి కానీ కాలనీలకు సరైన మౌలిక వసతులు కల్పించటంలో మాత్రం అప్పటి నుంచి ఇప్పటి వరకు ప్రభుత్వాలు విఫలమయ్యాయి.ఒంగోలు నగరపాలక సంస్థ పరిధిలోని కాలనీలకు సీసీ రోడ్ల నిర్మాణం చేపట్టలేదు. ఇక వర్షం పడితే ఆ కాలనీలు చెరువులను తలపిస్తాయి. కాలువలు లేకపోవటంతో ఇక నీళ్లు రోడ్ల మీద నుంచి కదిలే పరిస్థితి లేదు. దీనికి తోడు ఇప్పటికీ నిర్మాణం జరగని ప్రదేశాల్లో మురికి కూపాలు ఏర్పడి దోమలకు నిలువుగా మారాయి. చుట్టూరా నీరు చేరటంతో విషపు సర్పాలు, తేళ్లు ఇతర జంతువులు ఇళ్లలోకి చేరి కాలనీ వాసులను బెంబేలెత్తిస్తున్నాయి.

పిల్లలని పాఠశాలలకు పంపాలన్నా భయంతో ఇంట్లోనే జాగ్రత్తగా కాపలా కాస్తున్న పరిస్థితి అనుభవిస్తున్నారు. ఇప్పటికే రెండు సార్లు తమ సమస్య గురించి స్పందన కార్యక్రమంలో కలెక్టర్​కు ఫిర్యాదు చేసినా ఫలితం లేదని స్థానికులు చెప్తున్నారు. సాక్షాత్తు మంత్రి బాలినేని శ్రీనివాసులురెడ్డి నియోజకవర్గంలోనే ఈ దుస్థితి ఉన్నా పరిష్కార మార్గం చూపటం లేదని కాలనీ వాసులు తెలిపారు.
మూడు కాలనీల పరిస్థితే కాకుండా శివారు కాలనీ లయిన జాషువా కాలనీ, ప్రగతి కాలనీ, బలరాం కాలనీ లలో కూడా ఇదే పరిస్థితి నెలకొని ఉందని నగరవాసులు అంటున్నారు. వర్షాలు పడిన వెంటనే నగరపాలక సంస్థ అధికారులు సత్వరమే స్పందించి రోగాలబారిన పడకుండా ఆదుకోవాలని అధికారులను కోరుకొంటున్నారు.