KANNA : వైఎస్సార్ కాంగ్రెస్ పార్టీ పుట్టుకే ఒక మోసం.. జగన్ నమ్మక ద్రోహి : కన్నా లక్ష్మీనారాయణ

Kanna Lakshminarayana comments on Jagan: రాష్ట్రంలో వైఎస్సార్ కాంగ్రెస్ పార్టీ ఒక్క అవకాశం అంటూ.. అధికారంలోకి వచ్చి ప్రజలను నయవంచనకు గురిచేసిందని టీడీపీ నేత, మాజీ మంత్రి కన్నా లక్ష్మీనారాయణ విమర్శించారు. పల్నాడు జిల్లాలోని పలువురు వైసీపీ నాయకులు, కాపు సంఘ నాయకులు, కార్యకర్తలు, బీజేపీ నాయకులు టీడీపీలో చేరారు.

Kanna Lakshminarayana comments on Jagan: రాష్ట్రంలో వైఎస్సార్ కాంగ్రెస్ పార్టీ ఒక్క అవకాశం అంటూ.. మోసపూరిత వాగ్దానాలతో అధికారంలోకి వచ్చి ప్రజలను నయవంచనకు గురిచేసిందని టీడీపీ నాయకులు మాజీ మంత్రి కన్నా లక్ష్మీనారాయణ విమర్శించారు. ఆదివారం కన్నా లక్ష్మీనారాయణ సమక్షంలో తెలుగుదేశం పార్టీ పల్నాడు జిల్లా అధ్యక్షుడు జీవీ ఆంజనేయులు ఆధ్వర్యాన.. వైసీపీ 6వ వార్డు కౌన్సిలర్ గంధం కోటేశ్వరరావు సహా పలువురు కాపు సంఘం నాయకులు, కార్యకర్తలు, బీజేపీ నాయకులు, టీడీపీలో చేరారు. ఈ సందర్భంగా ఏర్పాటు చేసిన సమావేశంలో కన్నా లక్ష్మీనారాయణ మాట్లాడుతూ జగన్మోహన్ రెడ్డి కుట్రలు, కుతంత్రాలతో సానుభూతి పొంది అధికారంలోకి రావడానికి చేసిన దుర్మార్గపు ఆలోచనలు రోజు రోజుకూ తేట తెల్లం అవుతున్నాయని ధ్వజమెత్తారు.

వైఎస్ జగన్.. మూడున్నర సంవత్సరాలుగా తాడేపల్లి ప్యాలెస్ నుంచి బయటకు రాకుండా సహజ వనరులను కొల్లగొట్టి వేలకోట్లు దోచుకున్నారని కన్నా ఆరోపించారు. మరొక పక్క మంత్రులు, వైసీపీ ఎమ్మెల్యేలు ఇసుక, మట్టి, మద్యం, మైనింగ్ మాఫియాతో రాష్ట్రాన్ని కొల్లగొట్టారని ధ్వజమెత్తారు. వైఎస్సార్ కాంగ్రెస్ ప్రభుత్వం పరిపాలన చేతగాక విద్యుత్ చార్జీల పెంపు, ఆస్తి పన్ను పెంపు, చెత్త పన్నులు వేస్తూ ప్రజలపై పన్నుల భారం వేసిందని ఆరోపించారు. సంక్షేమం పేరుతో మరొక వైపు లక్షల కోట్లు అప్పులు చేసి రాష్ట్రాన్ని అంధకారంలోకి నెడుతున్నారని విమర్శించారు.

వైసీపీ ప్రభుత్వం వాలంటీర్ల వ్యవస్థను దుర్వినియోగం చేస్తోందని, సంక్షేమ పథకాల లబ్ధిదారులను, లబ్ధి పొందిన వారిని ఓటు వేసే విధంగా ఇబ్బందులు పెడుతున్నారని తెలిపారు. ఇలాంటి రాక్షసులు ఆంధ్రప్రదేశ్ రాష్ట్రానికి అవసరం లేదని.. జగన్మోహన్ రెడ్డి చేస్తున్న లూటీని ప్రజలు గమనించాలని హితవు పలికారు. దేశంలోనే ధనవంతుల జాబితాలో తన లక్ష్యం దిశగా జగన్మోహన్ రెడ్డి వెళ్లాలనుకుంటున్నాడని.. అదేవిధంగా రాష్ట్రంలో ఇసుక, మద్యం, గంజాయి అక్రమ వ్యాపారం మొత్తం తానే నిర్వహిస్తున్నాడని ఆరోపించారు. రాష్ట్రం అసాంఘిక కార్యక్రమాలకు అడ్డాగా మారిపోయిందని.. జగన్ మోహన్ రెడ్డి రాష్ట్రంలో చరిత్రహీనుడిగా మిగిలిపోతాడని అన్నారు.

చంద్రబాబు అనుభవ నాయకత్వంలో అమరావతి రాజధానిగా.. పోలవరం ప్రాజెక్టును భవిష్యత్తులో నిర్మించుకొని 2024లో చంద్రబాబు సీఎం అయ్యేందుకు తన వంతు కృషి చేస్తున్నామని కన్నా తెలిపారు. వైఎస్సార్ కాంగ్రెస్ పార్టీ పుట్టుకే ఒక మోసమని.. తండ్రి వైయస్ రాజశేఖర్ రెడ్డి ఆశయాలకు తూట్లు పొడిచి నమ్మక ద్రోహం చేసిన వ్యక్తి జగన్మోహన్ రెడ్డి అని అన్నారు. ఈ సందర్భంగా మాజీ శాసనసభ్యుడు జీవీ ఆంజనేయులు మాట్లాడుతూ వైఎస్సార్ ప్రభుత్వం, ముఖ్యమంత్రిపై పలు ఆరోపణలు చేశారు. అనంతరం జీవీ ఆంజనేయులు మాజీ మంత్రి కన్నా లక్ష్మీనారాయణను శాలువాతో సత్కరించారు.

ఇవీ చదవండి: