కోడుమూరు సభలో చంద్రబాబు ప్రసంగం రాయలసీమను రతనాల సీమగా మార్చుతామన్న హామీని నిలబెట్టుకుంటామన్నారు... ముఖ్యమంత్రి చంద్రబాబు. కర్నూలు జిల్లా కోడుమూరులో తెదేపా బహిరంగ సభకు హాజరైన ముఖ్యమంత్రి.. కేంద్ర మాజీ మంత్రి కోట్ల సూర్యప్రకాష్ రెడ్డి కుటుంబాన్ని పార్టీలోకి ఆహ్వానించారు.
సభావేదిక వద్ద పలు అభివృద్ధి పనులకు సీఎం శంకుస్థాపన చేశారు. వేదవతి ఎత్తిపోతల పథకం శిలాఫలకం, రాజోలిబండ కుడి ప్రధాన కాల్వ పనుల శిలాఫలకం , గుండ్రేవుల జలాశయం పైలాన్‌ ఆవిష్కరించారు. రూ.1,300 కోట్లతో ఎల్‌ఎల్‌సీ పైపులైన్ పనులకు శంకుస్థాపన చేశారు. ఫొటో ఎగ్జిబిషన్‌ను సందర్శించారు. వేదావతి ప్రాజెక్టు వల్ల 80 వేల ఎకరాలకు నీరు వస్తాయని... ఈ ప్రాంతం సస్యశ్యామలం అవుతుందని సీఎం చెప్పారు. ఆర్డీఎస్‌ కుడికాలువ ప్రాజెక్టు పనులకు ఇప్పటికే టెండర్లు పిలిచామని తెలిపారు. కర్నూలు జిల్లా ప్రజల కలలు సాకారం చేసే బాధ్యత తెదేపా ప్రభుత్వం తీసుకుందన్నారు . గుండ్రేవుల ప్రాజెక్టు వల్ల 20 టీఎంసీల నీళ్లు వస్తాయన్నారు. ప్రాజెక్టుతో కేసీ కెనాల్‌ ఆయకట్టు మొత్తం స్థిరీకరణ జరుగుతుందని తెలిపారు.
ఒకేరోజు రూ.8,100 కోట్ల విలువైన ప్రాజెక్టులకు పునాది వేయడం తన అదృష్టమని ముఖ్యమంత్రి ఆనందం వ్యక్తం చేశారు. రాయలసీమకు 214 టీఎంసీల సాగునీరు ఇచ్చామని స్పష్టం చేశారు.తాను, కేఈ, సూర్యప్రకాశ్‌రెడ్డి ముగ్గురూ రాయలసీమ బిడ్డలమేనని...రాయలసీమను రతనాల సీమగా మారుస్తానని హామీ ఇచ్చారు. కర్నూలులో హైకోర్టు బెంచ్‌ వచ్చేందుకు... పత్తికొండ, డోన్‌, ఆలూరులోని 62 చెరువులకు నీరిచ్చేందుకు కృషిచేస్తామని తెలిపారు.
