అయిదేళ్లయినా నిండలేదు.. ఆర్చరీలో ఆరితేరింది

ఓనమాలు దిద్దాల్సిన ఆ చిన్నారి చేతులు... గాంఢీవం పట్టాయి. బుడిబుడి అడుగులు వేస్తూ... తల్లి చాటున పెరగాల్సిన ఆ పాప... పతకాల వేటలో పరుగులు తీస్తోంది. అతి పిన్నవయసులోనే... విల్లు ఎక్కుపెడుతూ... అద్భుత ప్రతిభ కనబరుస్తోంది కర్నూలు జిల్లాకు చెందిన ఓ చిన్నారి.

విలువిద్యలో రాణించాలంటే కఠోర సాధన... ఎంతో ఏకాగ్రత ఉండాలి. ఇలా ఎంతో కష్టసాధ్యమైన విలువిద్యలో కర్నూలుకు చెందిన విష్ణువర్ధన్, వాణిల కుమార్తె హన్విక శ్రీ.. ప్రతిభ కనబరుస్తోంది. ప్రస్తుతం ఎల్​కేజీ చదువుతున్న ఈ చిన్నారి సుమారు రెండేళ్ల క్రితమే గాంఢీవం చేతపట్టి ఔరా అనిపిస్తోంది. అండర్- 9 విభాగంలో జిల్లా, రాష్ట్ర, జాతీయ స్థాయి పోటీల్లో పాల్గొని ఇప్పటికే ఎన్నో పతకాలు సాధించింది. జాతీయస్థాయిలో 30వ ర్యాంకు సాధించి శభాష్ అనిపించుకుంటోంది. జిల్లా, రాష్ట్రస్థాయి పోటీల్లో పదుల సంఖ్యలో పతకాలు, ప్రశంసా పత్రాలు పొంది అబ్బురపరుస్తోంది. ముఖ్యమంత్రి చంద్రబాబు సైతం ఈ చిన్నారి ప్రతిభ చూసి మురిసిపోయారంటే అతిశయోక్తి కాదు. కర్నూలు నగరంలో ప్రైవేటు వ్యక్తులు ఆర్చరీలో శిక్షణ ఇస్తున్నారు. మంచి కోచింగ్ కావాలంటే హైదరాబాద్, విజయవాడ లాంటి నగరాలకు వెళ్లాలి. ప్రభుత్వం శ్రద్ధ చూపి నగరంలోనే కోచ్​లను నియమించాలని హన్విక శ్రీ తల్లిదండ్రులు కోరుతున్నారు.