YS Sharmila comments on CM KCR: ప్రజాప్రస్థాన యాత్రకు అనుమతి నిరాకరించిన నేపథ్యంలో వైఎస్సార్టీపీ అధ్యక్షురాలు వైఎస్ షర్మిల ట్యాంక్ బండ్ వద్ద బైఠాయించి నిరసన తెలిపారు. షర్మిల నిరసన తెలుపుతూ.. అంబేడ్కర్ విగ్రహానికి వినతిపత్రం అందించారు. తర్వాత ప్రజా ప్రస్థాన పాదయాత్రకు పోలీసులు అనుమతి ఇవ్వాలని షర్మిల కోరారు.
రాష్ట్రంలో ప్రజాస్వామ్యాన్ని కేసీఆర్ ఖూనీ చేస్తున్నారని వైఎస్ షర్మిల అభిప్రాయపడ్డారు. ప్రశ్నించే గొంతుకలను అణచివేసి.. సంకేళ్లు వేస్తున్నారని వైఎస్ షర్మిల విమర్శించారు. సీఎం ప్రజాస్వామ్యాన్ని కాపాడాల్సింది పోయి.. ఇలా ప్రశ్నించిన వారిని అణగదొక్కడం భావ్యమేనా అని ప్రశ్నించారు. ప్రజాప్రస్థానం పాదయాత్ర ప్రజా సమస్యలను తెలుసుకొని వాటిని ప్రభుత్వానికి ఎత్తి చూపడానికి చేస్తున్న యజ్ఞం లాంటిదని ఆమె అన్నారు. పాదయాత్రను శాంతియుతంగా చేస్తున్నాము.. ఎక్కడా కూడా ఇబ్బంది కలిగించలేదన్నారు.
"వైఎస్సార్టీపీ పార్టీ వల్ల కేసీఆర్ పాలనకు ప్రమాదం ఉందని తెలిసే.. పాదయాత్రను ఆపడానికి కుట్రలు చేస్తున్నారు. 3500 కి.మీ. దాటిన తరవాత ఒక ఆడపిల్ల పాదయాత్ర చేస్తే టీఆర్ఎస్ వాళ్లు మాపై దాడి చేశారు. ప్రశ్నించే గొంతులను అణచివేస్తున్నారు. బేడీలు వేస్తున్నారు. సీఎం ప్రజాస్వామ్యాన్ని కాపాడాల్సింది పోయి ప్రజాస్వామ్యాన్ని ఖూనీ చేస్తున్నారు." -వైఎస్ షర్మిల, వైఎస్సార్టీపీ అధ్యక్షురాలు