రాష్ట్రంలో గ్రామ, వార్డు సచివాలయాల్లో వివిధ కేటగిరిలో లక్షా 26 వేల 728 పోస్టుల భర్తీకి ఇటీవలే వైకాపా సర్కార్ నియామక ప్రక్రియ చేపట్టింది. ఎంపికైన వారంతా ఇప్పటికే ఆయా పోస్టుల్లో చేరారు. అయితే నియామక ప్రక్రియ ముగియటంతో మిగిలిపోయిన పోస్టులపై పంచాయతీరాజ్ శాఖ నివేదిక తయారు చేస్తోంది. ప్రాథమిక సమాచారం మేరకు రాష్ట్రంలో అన్ని పోస్టులు కలిపి 25 వేల 287 పోస్టులు మిగిలి పోయాయి.
| జిల్లా | ఖాళీలు |
| చిత్తూరు | 3,384 |
| తూర్పు గోదావరి | 2,694 |
| విశాఖపట్నం | 2,307 |
| అనంతపురం | 2,158 |
| పశ్చిమ గోదావరి | 2,012 |
| కర్నూలు | 1939 |
| నెల్లూరు | 1911 |
| కృష్ణా | 1966 |
| శ్రీకాకుళం | 1865 |
| విజయనగరం | 1664 |
| కడప | 1599 |
మిగిలిపోయిన 25 వేలకు పైగా ఖాళీలకు అదనంగా మరికొన్నిపోస్టులు చేరే అవకాశాలున్నాయి. ఇవన్నీ కలిపితే ఖాళీల సంఖ్య 30 వేల వరకు చేరుతుందని అంచనా. ఈ పోస్టులను ఎలా భర్తీచేయాలనే విషయమై అధికారులు ఓ నిర్ణయానికి రాలేకపోతున్నారు. అర్హులైన అభ్యర్థులు లేనందున వివిధ కేటగిరీలకు సంబంధించిన పరీక్షల్లో వచ్చిన అర్హత మార్కులను తగ్గిస్తే తప్ప భర్తీ చేపట్టటం సాధ్యం కాదని అధికార వర్గాలంటున్నాయి. అర్హత మార్కుల తగ్గింపు అంశం ముఖ్యమంత్రి నిర్ణయం తీసుకోవాల్సి ఉంది. ఇకపై ఏటా జనవరిలో ఉద్యోగ నియామకాలు చేపడతామని సీఎం జగన్ ఇప్పటికే ప్రకటించారు. ఈ మేరకు గ్రామ సచివాలయ పోస్టులను జనవరిలో తిరిగి నోటిఫికేషన్ జారీచేసి భర్తీ చేస్తారా లేక అర్హత మార్కులు తగ్గించటం ద్వారా ఇప్పుడే భర్తీ చేస్తారా అనేది ప్రభుత్వం తేల్చాల్సి ఉంది. ఈ విషయంలో సీఎం ఎలాంటి నిర్ణయం తీసుకుంటారనే విషయం ఆసక్తికరంగా మారింది. కటాఫ్ మార్కులు తగ్గింపుపై చాలా మంది ఆశలుపెట్టుకున్నారు. ఇప్పటికే ఎంపికైన అభ్యర్థులు ఈనెల 14 లోపు తప్పక విధుల్లో చేరాలి. ఆరోజు వరకు చూసి ఖాళీల తుది జాబితా సిద్దం చేస్తారు. ఈ నెల 15 తర్వాతే పోస్టుల భర్తీపై ప్రభుత్వం ఓ నిర్ణయం తీసుకునే అవకాశాలున్నట్లు అధికార వర్గాలు చెబుతున్నాయి.
