కృష్ణా జిల్లాలో అభ్యర్థుల ప్రచార దూకుడు

కృష్ణా జిల్లాలో ఎన్నికల ప్రచారం జోరుగా కొనసాగుతోంది. ప్రధాన పార్టీల అభ్యర్థులు... ఇంటింటికీ వెళ్లి ఓటర్లను కలుస్తున్నారు. కరపత్రాలు పంచుతున్నారు. తమకే ఓటు వేయాలని విజ్ఞప్తి చేస్తున్నారు.

మచిలీపట్నం తెదేపా అభ్యర్థులు కొనకళ్ల నారాయణరావు, కొల్లు రవీంద్ర... నియోజకవర్గంలో ముమ్మరంగా ప్రచారం చేశారు. కానూరు గ్రామంలో ఇంటింటికీ వెళ్లి ఓట్లు అభ్యర్థించారు. గతంలో ఎన్నడూ లేని విధంగా నియోజకవర్గంలో అభివృద్ధి, సంక్షేమ కార్యక్రమాలు చేపట్టామనీ.. మరోసారి అవకాశమిస్తే మరింత అభివృద్ధి చేస్తామని హామీ ఇచ్చారు. వైకాపా అభ్యర్థి పేర్ని నాని పట్టణ పరిధిలోని విశ్వబ్రాహ్మణ కాలనీ, తదితర ప్రాంతాల్లో రోడ్​షో చేశారు. ఫ్యాన్ గుర్తుకు ఓటు వేసి వైకాపాను గెలిపించాలని కోరారు.

పామర్రులో వైకాపా అభ్యర్థి కే.ఎల్. అనిల్ మండుటెండను లెక్కచేయకుండా ఎన్నికల ప్రచారం చేశారు. ఓటర్లను కలిసి సమస్యలు తెలుసుకుంటున్నారు. అధికారంలోకి వస్తే పరిష్కరిస్తానని హామీ ఇచ్చారు. నవరత్నాల గురించి వివరించారు.

ముత్యాలంపాడులో కాంగ్రెస్ సెంట్రల్ అభ్యర్థి గుర్నాధం, ఎంపీ అభ్యర్థి నరసింహారావు ఎన్నికల ప్రచారం చేశారు. ఏఐసీసీ సభ్యులు కొప్పుల రాజుతో కలిసి ఇంటింటి ప్రచారం నిర్వహించారు. పార్టీ మేనిఫెస్టోను ప్రజలకు వివరిస్తూ ఓట్లను అభ్యర్థించారు. కాంగ్రెస్ పార్టీపై గతంలో కంటే ప్రజలకు విశ్వాసం, నమ్మకం పెరిగాయనీ...ప్రజా స్పందన కాంగ్రెస్ పార్టీకి అనుకూలంగా ఉందని కొప్పుల రాజు చెప్పారు. రాహుల్ గాంధీ ప్రధాని అవ్వడం ఖాయమని, మొదటి సంతకం ప్రత్యేక హోదాపై చేస్తారని నరసింహారావు హామీ ఇచ్చారు.

కృష్ణా జిల్లా జగ్గయ్యపేట మండలం మల్కాపురం గ్రామంలో తెదేపా ఎమ్మెల్యే అభ్యర్థి శ్రీరామ్ రాజగోపాల్ తాతయ్య ఎన్నికల ప్రచారం చేశారు. సైకిల్ గుర్తుపై ఓటు వేసి తెదేపాను గెలిపించాలని కోరారు.

ఇవీ చదవండి..