'ఎస్మా చట్టాలకు భయపడం' - సమస్యలు పరిష్కరించే వరకు వెనక్కి తగ్గెదే లేదు: అంగన్వాడీలు

Government has implemented Esma Act on Anganwadis: అంగన్వాడీలపై ప్రభుత్వం ఎస్మాను ప్రయోగించి ప్రజాస్వామ్యాన్ని ఖూనీ చేసిందని విపక్ష నేతలు మండిపడుతున్నారు. రాష్ట్ర వ్యాప్తంగా అంగన్వాడీలు 27 రోజులుగా సమ్మె చేస్తున్నారు. సమస్యలను పరిష్కరించే వరకు ఎటువంటి చట్టాలకు భయపడేది లేదని అంగన్వాడీలు తేల్చి చెప్పారు. సంక్రాంతిలోగా డిమాండ్లు నెరవేర్చాలని లేకుంటే రాష్ట్ర వ్యాప్తంగా బంద్ చేపడతామని మరోసారి ప్రభుత్వాన్ని హెచ్చరించారు.

Government Has Implemented ESMA Act on Anganwadis: అంగన్వాడీలపై ప్రభుత్వం ఎస్మాను ప్రయోగించి ప్రజాస్వామ్యాన్ని ఖూనీ చేసిందని విపక్ష నేతలు ఆగ్రహం వ్యక్తం చేశారు. ప్రభుత్వం జీవో నెంబర్2 తెచ్చి అంగన్వాడీలపై దుర్మార్గపు చర్యలకు పాల్పడుతోందని మండిపడ్డారు. సమస్యల పరిష్కారం కోసం విజయవాడలో అంగన్వాడీలు రిలే నిరాహార దీక్షలు చేపట్టారు. వీరి నిరసనకు కాంగ్రెస్, వామపక్ష నేతలు మద్దతు తెలిపారు. హామీలను నెరవేర్చేవరకు వారికి అండగా ఉంటామని భరోసా ఇచ్చారు. సంక్రాంతిలోగా డిమాండ్లు నెరవేర్చాలని కోరారు. లేకుంటే రాష్ట్ర వ్యాప్తంగా బంద్ చేపడతామని హెచ్చరించారు.

CPM leaders support Anganwadis: ఎస్మా చట్టాలకు భయపడేది లేదని కర్నూలు జిల్లా సీపీఎం జిల్లా కార్యదర్శి గౌస్ దేశాయ్ తెలిపారు. అంగన్వాడీలపై రాష్ట్ర ప్రభుత్వం ఎస్మా చట్టాన్ని ఉపయోగించడాన్ని ఆయన తీవ్రంగా వ్యతిరేకిస్తూ అంగన్వాడీలకు సీపీఎం నాయకులు మద్దతుగా ఉంటారని తెలిపారు. గతంలో ఎస్మా చట్టాన్ని ప్రయెగించిన ప్రభుత్వాలు ఓడిపోయాయని అదే విధంగా వైసీపీ ప్రభుత్వాం కూడా ఓటమి తప్పదని ఆయన తెలిపారు. అంగన్వాడీ సిబ్బంది భయపడకుండా సమ్మె చేయాలన్నారు.

Anganwadi Strike in Ongole Collectorate:తమ కార్యకర్తలపై ప్రభుత్వం ఉక్కు పాదం మోపిందని అంగన్వాడీలు మండిపడ్డారు. ఒంగోలు కలెక్టరేట్ ఎదుట అంగన్వాడీలు 24 గంటల దీక్ష శిబిరం నిర్వహించారు. అంగన్వాడీలకు యూటీఎఫ్ ఉద్యోగులు మద్దతు తెలిపారు. ఈ సందర్భంగా అంగన్వాడీలు మాట్లాడుతూ ప్రభుత్వం తమకు తీవ్ర అన్యాయం చేసిందని మండిపడ్డారు. ప్రభుత్వం అంగన్వాడీలకు జీవో నెంబర్2 తీసుకొచ్చి చాలా తప్పు చేసిందని ఆవేదన వ్యక్తం చేశారు. అంగన్వాడీలకు 26వేల రూపాయల వేతనం ఇవ్వాలన్నారు. 27 రోజుల నుంచి సమ్మె చేస్తుంటే ప్రభుత్వం ఎందుకు పట్టించుకోవడం లేదని నిలదీశారు. ప్రభుత్వం ఇచ్చిన జీవో నెంబర్2ను తక్షణమే ఉపసంహరించుకోవాలని అంగన్వాడీలు డిమాండ్ చేశారు. ఇలాంటి నల్ల జీవోలు తెచ్చిన అంగన్వాడీలు భయపడేది లేదని తేల్చి చెప్పారు. ఇప్పటికైనా అంగన్వాడీల సమస్యలను పరిష్కరించకపోతే పెద్ద ఎత్తున ఉద్యమం చేసేందుకు భయపడే లేదని తెలిపారు.

Anganwadi Strike in Ananthapuram:అనంతపురం జిల్లా ఉరవకొండలో అంగన్వాడీలు ప్రభుత్వం జారీ చేసిన జీవో పత్రులను దహనం చేశారు. జీవో పత్రులను దహనాన్ని పోలీసులు అడ్డుకున్నారు. కనీస వేతనం, గ్రాట్యుటీ, ఉద్యోగ భద్రత డిమాండ్లను ప్రభుత్వం నెరవేర్చకుంటే సమ్మెను మరింత ఉద్ధృతం చేస్తామని హెచ్చరించారు ఎస్మా జీవో పేపర్లకు నిప్పి పెట్టి అనంతపురంలో అంగన్వాడీలు ఆందోళన చేపట్టారు. కలెక్టర్ కార్యాలయం ముందు 27వ రోజు ప్రభుత్వానికి వ్యతిరేకంగా నినాదాలు చేశారు. ఇలాంటి జీవోలకు బెదిరేది లేదని ప్రభుత్వం గుర్తుంచుకోవాలన్నారు. అక్క చెల్లెమ్మలంటూ వైసీపీ ప్రభుత్వం అధికారంలోకి వచ్చి, ఇవాళ రోడ్డుపైన మహిళలు ఆందోళన వ్యక్తం చేస్తున్నా ప్రభుత్వం పట్టించుకోవడం లేదని ఆందోళన వ్యక్తం చేశారు. మంత్రులు సైతం తమ సమస్యలపై మాట్లాడకపోవడం వారి పాలన నియంత్రణకు నిదర్శనం అన్నారు. రానున్న ఎన్నికల్లో ఈ ప్రభుత్వానికి తగిన బుద్ధి చెబుతామని హెచ్చరించారు. సమస్యలు పరిష్కరించే వరకు పోరాటం ఆపేది లేదన్నారు.

Anganwadi strike in konaseema District: సమ్మెను అణచివేసేందుకు ప్రభుత్వం ఎన్ని చర్యలు చేపట్టినా భయపడేదిలేదని అంగన్వాడీలు, కార్మికులు తేల్చి చెప్పారు. 27వ రోజు సమ్మెలో భాగంగా కోనసీమ జిల్లా ముమ్మిడివరం ఐసీడీఎస్ కార్యాలయం వద్ద అంగన్వాడీలు జాతీయ జెండా రంగు చీరలను ధరించి ప్రభుత్వానికి వ్యతిరేకంగా నినాదాలు చేశారు. అంగన్వాడీలకు మద్దతుగా ఓ చిన్నారి భారతమాత వేషధారణతో ధర్నాలో పాల్గొంది.

Vizianagaram Collectorate: రాష్ట్ర ప్రభుత్వం వెంటనే ఎస్మా చట్టాన్ని వెనక్కి తీసుకోవాలని అంగన్వాడీలు డిమాండ్ చేశారు. రాష్ట్రవ్యాప్త సమ్మెలో భాగంగా విజయనగరం కలెక్టరేట్ వద్ద అంగన్వాడి అంగన్వాడీల చేస్తున్న నిరాహార దీక్ష రెండో రోజుకు చేరుకుంది. తమ న్యాయమైన సమస్యలు వెంటనే పరిష్కారం చేయాలని అంగన్వాడీలు ప్రభుత్వాన్ని కోరుతున్నారు.

Parvathipuram Collectorate: పార్వతీపురం మన్యం జిల్లా కేంద్రం కలెక్టరేట్ వద్ద అంగన్వాడీలు, కార్యకర్తలు నిరసన కార్యక్రమాలు చేపట్టారు. నిరవధిక సమ్మెలో భాగంగా 27వ రోజు నిరసన తెలియజేశారు. పోరాటాన్ని ఉద్ధృతం చేస్తూ రెండు రోజులుగా నిరాహార దీక్షలు చేపట్టారు. ప్రభుత్వం అంగన్వాడీలపై ఎస్మా చట్టాన్ని ప్రకటించిన భయపడేది లేదంటూ పోరాటమే మా మార్గం అంటూ నిరసన కొనసాగించారు.

Anganwadi strike in Bapatla: ప్రభుత్వం ఎస్మా ప్రయోగించిన తమ సమస్యలు పరిష్కారం కానిదే సమ్మె విరమించే ప్రసక్తే లేదని అంగన్వాడీ కార్యకర్తలు తేల్చి చెప్పారు. బాపట్లలో రిలే నిరాహార దీక్షల ప్రారంభించి వైసీపీ ప్రభుత్వానికి వ్యతిరేకంగా నినాదాలు చేశారు. సమ్మె చేస్తున్న వారిని చర్చలకు పిలిచి సమస్యలు పరిష్కరించాల్సిన ప్రభుత్వం ఎస్మా పేరుతో భయపెట్టాలని చూస్తుందన్నారు. వెంటనే ఎస్మా ఎత్తివేయాలని డిమాండ్ చేశారు. అంగన్వాడీలు, పారిశుద్ధ కార్మికుల సమస్యలు పరిష్కరించాలని కోరారు.