కృష్ణాజిల్లాలో విజయవాడ దుర్గ గుడి తర్వాతి స్థానంలో కొనసాగుతున్న పెనుగంచిప్రోలు శ్రీ తిరుపతమ్మ దేవాలయంలో అధికారుల అనాలోచిత నిర్ణయాలు ఆలయానికి గండి కొడుతున్నాయి. కళ్లెదుటే లక్షల ఆదాయాన్ని ప్రైవేటు వ్యక్తులు తన్నుకు పోతుంటే చూస్తూ ఊరుకుంటున్నారు. లాక్డౌన్ తర్వాత తిరిగి తెరుచుకున్న ఆలయంలో పలు రకాల వ్యాపారాల నిర్వహణపై పెద్ద ఎత్తున ఆరోపణలు వినిపిస్తున్నాయి. సెప్టెంబర్ మొదటి వారం నుంచి ఆలయానికి ఓ మోస్తరుగా భక్తుల రాక మొదలైంది. కానీ ఆలయం వద్ద వేలం ద్వారా వ్యాపారాలు దక్కించుకున్న గుత్తేదారులు దుకాణాలు తెరిచేందుకు ముందుకు రాలేదు. వారితో పలుమార్లు ఆలయ అధికారులు చర్చలు జరిపారు. లాక్డౌన్ కాలంలో తాము వ్యాపారాలు చేయనందున గడువు పెంచాలని గుత్తేదారులు డిమాండ్ చేశారు. దీనిపై ఆలయ ఈవో రాష్ట్ర దేవాదాయ కమిషనర్కు నివేదించారు. ఉన్నతాధికారుల నుంచి స్పందన లేకపోవటం వల్ల వ్యాపారాలు స్తంభించిపోయాయి. భక్తులు సమర్పించే తలనీలాలు, వస్త్రాలను దేవస్థానం ఆధ్వర్యంలో స్వీకరించి భద్రపరుస్తున్నారు.
నామమాత్రపు రుసుములకే విలువైన వ్యాపారాలు అప్పగింత
కొబ్బరికాయలు, నిమ్మకాయలు, ఇతర పూజా ద్రవ్యాల విక్రయాలతో పాటు క్యాంటీన్, పొంగలి షెడ్డు, వాహనాల పార్కింగ్ వంటి ఇతర వ్యాపారాలు చేసుకునేందుకు రోజువారి రుసుములు చెల్లించి నిర్వహించుకునేలా ఆలయ అధికారులు ప్రైవేటు వ్యక్తులకు అప్పగించారు. వీటిలో ఖరీదైన కొబ్బరికాయలు, నిమ్మకాయల విక్రయాలు, పొంగలి షెడ్డు, వాహనాల పార్కింగ్ వ్యాపారాలకు సంబంధించి రుసుములు వసూలు చేస్తున్న విషయంలో అధికారుల వద్ద స్పష్టత కరువైంది. మొదట్లో రోజుకు రెండు వేలు, భక్తులు అధికంగా ఉండే శుక్ర, ఆదివారాల్లో నాలుగు వేలు అని చెప్పిన అధికారులు...ఆ తర్వాత మాట మార్చి రోజుకు రూ. 500 శుక్ర, ఆదివారాల్లో ఏడు వేలు వస్తోందని అని చెబుతున్నారు. ప్రైవేటు వ్యక్తులకు వ్యాపారాలు అప్పగించే విషయంలో గతంలో మాదిరి అధికారులు ఎక్కడ బహిరంగంగా వేలం నిర్వహించలేదు. గోప్యంగా దుకాణాలు అప్పగించటం పట్ల స్థానికులు అధికారుల తీరుపై ఆక్షేపణ వ్యక్తం చేస్తున్నారు. పరిస్థితి ఇలాగే కొనసాగితే అమ్మవారి దేవాలయానికి కోట్లలో నష్టం వాటిల్లుతుందని వారు ఆరోపిస్తున్నారు.
తిరిగి వేలం పాట నిర్వహిస్తాం