Bjp : ముఖ్యమంత్రి జగన్మోహన్ రెడ్డి ఎస్సీ అట్రాసిటీ కేసు నమోదుకు అర్హుడని ఎస్సీ కార్పొరేషన్‌ మాజీ ఛైర్మన్‌, బీజేపీ అధికార ప్రతినిధి ఆర్‌ డీ విల్సన్ అన్నారు. జగన్ పాలనలో ఎస్సీ కార్పోరేషన్‌కు ఒక్క రూపాయి కేటాయించలేదని... జయహో ఎస్సీ అని చెప్పుకోవడానికి వైఎస్సార్సీపీ నేతలకు సిగ్గుండాలని ధ్వజమెత్తారు. ఎస్సీల అభ్యున్నతికి జగన్ ఏం చేశారో చెప్పాలని డిమాండ్‌ చేశారు. ఎస్సీల కోసం ప్రధాన మంత్రి నరేంద్ర మోదీ ఇచ్చిన డబ్బులను కూడా ఇతర అవసరాలకు మళ్లించారని, ఎస్సీల నిధులే కాదు.. వారి భూములను కూడా లాగేసుకున్నారన్నారు. ఎక్కడా శిక్షణ కార్యక్రమాలు లేవని, ఉపాధి లేకుండా చేశారని మండిపడ్డారు. దళితులను ఉధ్దరించినట్లు చెబుతున్న వైఎస్సార్సీపీ నేతలు, మంత్రులు ఆత్మ పరిశీలన చేసుకోవాలని హితవు పలికారు. ఎస్సీలకు రాష్ట్ర ప్రభుత్వం చేసిన మోసాలపై త్వరలో ప్రత్యక్ష ఆందోళనలు చేపడతామని తెలిపారు.
ఒక్క రూపాయి కూడా ఇవ్వడం లేదు.. నేను చైర్మన్ గా ఉన్నపుడు ప్రతి జిల్లాకు తక్కువలో తక్కువగా 10 కోట్ల రూపాయలు ఇచ్చాను... కానీ, ఇప్పుడున్న చైర్మన్లు మాల, మాదిక, రెల్లి పేర్లతో మూడు ముక్కలు చేశారని విల్సన్ మండిపడ్డారు. ఇప్పుడున్న చైర్మన్లు ఎస్సీలకు ఒక్క రూపాయి కూడా ఇవ్వడం లేదని, ఎస్సీలకు ఏం చేశారని జయహో ఎస్సీ అంటారని ప్రశ్నించారు. భారత దేశంలో ఏ ఒక్క ముఖ్యమంత్రి కూడా ఎస్సీ కార్పోరేషన్ డబ్బులను దారి మళ్లించిన ఉదంతాల్లేవు అని తెలిపారు. ప్రధాన మంత్రి నరేంద్ర మోదీ ఇచ్చే డబ్బులు ఎన్ఎస్ఎఫ్, ఎన్ఎస్కేఎఫ్ డీసీ, ఎన్బీఎఫ్డీసీ, మైనార్టీ కార్పోరేషన్లకు ఇచ్చే నిధులను డైవర్ట్ చేసే అధికారం ముఖ్యమంత్రికి ఉంటుందా? అట్రాసిటీ కేసు నమోదు చేయడానికి జగన్ మోహన్ రెడ్డి అర్హుడు అని విల్సన్ పేర్కొన్నారు.