తీరం.. జోరుగా జూదం!

గుంటూరు జిల్లాలో తీర ప్రాంతం పేకాట కేంద్రాలకు అడ్డాగా మారింది. రొయ్యల చెరువుల్లో గుట్టు చప్పుడు కాకుండా హైదరాబాద్‌తో పాటు ఐదు జిల్లాల నుంచి వస్తున్న జూదరులతో రోజూ రూ.కోట్లలో దందా సాగుతోంది. వందల సంఖ్యలో పేకాట రాయుళ్లు వచ్చి రోజూ రూ.కోటి పైనే జూదం ఆడుతుండటం, నిర్వాహకులకు ఖర్చులన్నీ పోను రూ.నాలుగైదు లక్షలు మిగులుతుండటంతో ఒక నేత అండదండలతో ఏడాదిన్నరగా పేకాట క్లబ్బులు నిర్వహిస్తున్నారు.

జూదం ఆడటం కోసమే పేకాటరాయుళ్లు గోవా, హైదరాబాద్, బెంగళూరు, శ్రీలంక రాజధాని కొలంబో, మకావు ప్రాంతాల్లో పేకాట క్లబ్బులు, క్యాసినోలకు వెళ్లేవారు. వీరు రోజూ రూ.లక్షల నుంచి కోట్లలో జూదం ఆడతారు. కరోనా కారణంగా క్యాసినోలు, పేకాట క్లబ్బులు మూతపడ్డాయి. విదేశాలకు వెళ్లే పరిస్థితి లేదు. కరోనా లాక్‌డౌన్, కర్ఫ్యూ పరిస్థితుల్లోను గుంటూరు జిల్లా నిజాంపట్నంలో ప్రత్యేకంగా గుడారాలు వేసి ఏసీలు ఏర్పాటు చేసి సకల సౌకర్యాలతో చేసి వారిని ఆకర్షిస్తున్నారు. గతంలో పోలీసులు దాడులు చేసినా ముందుగానే సమాచారం అంది ప్రముఖులు, కీలకమైన వ్యక్తులు తప్పించుకున్న సంఘటనలు అనేకం.

నిజాంపట్నం శివారు చింతరేవు, ముండ్రేడు సమీపంలోని రొయ్యల చెరువుల వద్ద రెండు పేకాట స్థావరాల్లో భారీగా జూదం ఆడుతున్నారన్న పక్కా సమాచారంతో ముందస్తుగా సమాచారం లీకు కాకుండా స్పెషల్‌ ఎన్‌ఫోర్స్‌మెంట్ అధికారులు, పోలీసులు మూడ్రోజుల కిత్రం మెరుపు దాడులు చేసి 79 మంది జూదరులు, నిర్వాహకులను అదుపులోకి తీసుకొని రూ.48,75,565 నగదు, 42 కార్లు, 24 మోటార్‌ సైకిళ్లను స్వాధీనం చేసుకున్నారు. గతంలో ఎన్నడూ లేని విధంగా సుమారు రూ.అర కోటి నగదు స్వాధీనం చేసుకున్నాక సంచలనం సృష్టించింది. పోలీసులు వరుసగా దాడులు చేస్తున్నా జూదం కేంద్రాల నిర్వాహకులు స్థావరాలు మారుస్తూ దందా కొనసాగిస్తున్నారు.

పశ్చిమ గోదావరి జిల్లా భీమవరం ప్రాంతానికి చెందిన ఒక వ్యక్తి, నిజాంపట్నం ప్రాంతానికి చెందిన నలుగురు వ్యక్తుల సహకారంతో ఏడాదికి పైగా జూదం కేంద్రాలు నిర్వహిస్తూ భారీగా అర్జిస్తున్నారు. స్థానికంగా ఒక నేత పూర్తి స్థాయిలో సహకరిస్తున్నారు. తూర్పు, పశ్చిమ గోదావరి, కృష్ణా, గుంటూరు, ప్రకాశం జిల్లాలకు చెందిన పేకాట రాయుళ్లతో పాటు హైదరాబాద్‌ నుంచి కాసుల సంచులు తీసుకొని ఖరీదైన కార్లలో నిజాంపట్నం వచ్చి జూదం ఆడుతున్నారు. పెద్ద భవనాన్ని తీసుకుని సకల వసతులు సమకూర్చారు. రోజూ లావాదేవీలు రూ.రెండు కోట్ల పైన ఉందంటే జూదం ఏ స్థాయిలో జరుగుతుందో అర్థం చేసుకోవచ్చు. నగదు లెక్కించటానికి యంత్రాలు ఏర్పాటు చేశారు.

జూదంలో తెచ్చుకున్న నగదు పోతే అక్కడిక్కడే ఆస్తులు తనఖా పెట్టుకుని, ప్రాంసరీ నోట్లపై సంతకాలు చేయించుకొని పందాలు ఆడేవారికి నిర్వాహకులు రూ.లక్షల్లో రుణాలిస్తున్నారు. సంక్రాంతి సీజన్‌ సమయంలో హార్బర్‌ సమీపంలోని ఒక రహస్య ప్రాంతానికి పందెంరాయుళ్లు పడవల్లో చేరుకుని భారీగా పేకాట, కోళ్ల పందాలు ఆడారు. జిల్లా ఎస్పీ ఆదేశాలలో పోలీసులు పేకాట స్థావరాలపై మూడు సార్లు మెరుపు దాడులు చేసినా భారీగా నగదు దొరకలేదు. కొద్ది మొత్తంలో నగదు, జూదరులు మాత్రమే పట్టుబడ్డారు. బడాబాబులు తప్పించుకున్నారు.

ఒక ప్రైవేట్‌ రిసార్ట్స్‌లో...

నిజాంపట్నంపై నిఘా పెరగటంతోపాటు దూర ప్రాంతాల నుంచి వచ్చే వారికి అనువుగా ఉంటుందని గత ఏప్రిల్‌లో బాపట్ల- సూర్యలంక మార్గంలోని రాంనగర్‌ వద్ద ఓ ప్రైవేటు రిసార్ట్స్‌లో జూదం కేంద్రాలు ఏర్పాటు చేసి పేకాట ఆడించారు. విశ్వసనీయ వర్గాల సమాచారంతో గత ఏప్రిల్‌ 11న రిసార్ట్స్‌పై బాపట్ల గ్రామీణ పోలీసులు దాడి చేయగా రూ.24.70 లక్షల నగదు పట్టుబడింది. జూదం ఆడుతున్న 34 మందిని అదుపులోకి తీసుకుని కేసు నమోదు చేశారు. ఆ సమయంలో పందెంరాయుళ్ల కారులు, వాహనాలు, సెల్‌ఫోన్లు స్వాధీనం చేసుకోకపోవటంపై పోలీసులపై విమర్శలొచ్చాయి. ఈ సారి దాడిలో కీలకవ్యక్తులు పట్టుబడ్డారు. పట్టుబడ్డవారిని అర్థరాత్రి బాపట్ల గ్రామీణ పోలీస్‌స్టేషన్‌కు తీసుకువచ్చి అరెస్టు చూపించారు. స్టేషన్‌ బెయిల్‌పై నిందితులు విడుదలయ్యారు.

నిర్వాహకులపై చర్యలు తీసుకుంటేనే..

కొద్ది రోజులకే బాపట్లలో పట్టుబడ్డ కీలకవ్యక్తులే నిజాంపట్నం మండలంలో రెండు రహస్య ప్రాంతాల్లో రొయ్యల చెరువుల వద్ద జూద స్థావరాలు ఏర్పాటు చేసి రోజూ రూ.కోట్లలో పేకాట ఆడిస్తున్నారు. 24 గంటలు జూదం ఆడుకోవటానికి జనరేటర్‌ ఏర్పాటు చేశారు. ఖర్చులన్నీ పోనూ ఆట ఆడించినందుకు రోజూ రూ.లక్షల్లో వారికి మిగులుతున్నాయి. ఎన్నిసార్లు పట్టుబడినా చిన్న సెక్షన్ల కింద మాత్రమే కేసులు నమోదు చేసి స్టేషన బెయిల్‌పై వెంటనే పంపిస్తుండటంతో వారికి ఏ మాత్రం భయపడటం లేదు. కొందరు బడా నేతలు మద్దతు పూర్తిగా ఉండటంతో ఏడాదిన్నరకు పైగా జూదం ఆడిస్తూనే ఉన్నారు.

కరోనా వైరస్‌ మొదటి, రెండు ఉద్ధృతుల సమయంలో లాక్‌డౌన్‌ అమలులో ఉన్నా పేకాట క్లబ్బులు మాత్రం మూతపడ లేదు. పోలీసులు దాడులు చేసి పట్టుకున్న ప్రతిసారి స్థావరాలు మారుస్తూ దందా కొనసాగిస్తున్నారు. నగదు యంత్రాలతో సొమ్ము లెక్కించి గోతాల్లో వేసి తీసుకెళుతున్నారు. కొందరు జూదరులు రూ.కోట్లలో నగదు, ఆస్తులు కోల్పోయి వందల కుటుంబాలు వీధిన పడుతున్నాయి. తీరంలో గతంలో ఎన్నడూ లేని విధంగా 365 రోజులు పేకాట ఆడే సంస్కృతిని నిర్వాహకులు తమ అక్రమార్జన కోసం ప్రోత్సహిస్తున్నారు. సెబ్‌ నుంచి ఏఎస్పీ స్థాయి అధికారి నేతృత్వంలో పోలీసులు దాడులు చేయడంతో మరోసారి భారీగా నగదు పట్టుబడింది. పోలీసు ఉన్నతాధికారులు ప్రత్యేక దృష్టి సారించి నిర్వాహకులపై కఠినచట్టాలపై కేసులు నమోదు చేసి మరలా జూదం ఆడించకుండా గట్టి చర్యలు తీసుకోవాలని తీర ప్రాంత వాసులు కోరుతున్నారు.

ఇదీ చదవండి: