Tenali taluka School Closed Due to GO 117: పన్నెండు దశాబ్దాల చరిత్ర గల పాఠశాల.. ప్రభుత్వ చర్యలతో మూతపడే స్థాయికి..

Tenali taluka School Closed Due to GO 117: 120 ఏళ్ల విశిష్ట చరిత్ర కలిగినది తెనాలి తాలుకా హైస్కూల్‌ కాల గర్భంలో కలిసిపోయింది . ఎందరో సినీ, రాజకీయ ప్రముఖులు ఓనమాలు దిద్దుకున్న ఈ పాఠశాల మూతపడింది. తెల్లదొరలపై పోరాడేందుకు సైతం ఎంతో మంది యోధుల్ని అందించిన ఘన చరిత్ర ఈ పాఠశాలది. జగన్‌ ప్రభుత్వం తెచ్చిన 117 జీవో, విలీన ప్రక్రియతో మూసివేతకు దారి తీసింది.

Tenali Talika School Closed Due to GO 117: 50 కాదు 100 కాదు.. ఏకంగా 120 ఏళ్ల చరిత్ర ఆ పాఠశాల సొంతం. పరాయి పాలకుల బానిస సంకెళ్ల నుంచి విముక్తి కోసం స్వాతంత్య్ర ఉద్యమంలో పోరాడిన ఎందరో యోధుల్ని అందించిన విద్యా కేంద్రమది. తెనాలి పరిసర ప్రాంతాల్లోని వేలాది నిరుపేద పిల్లలకు చదువు నేర్పిన సరస్వతి నిలయం. సినీ, రాజకీయ, వ్యాపార, విద్య, వైద్య రంగాల్లో దేశం మెచ్చే ప్రముఖులను తీర్చిదిద్దిన అత్యుత్తమ విద్యా కుసుమం తెనాలి తాలుకా ఉన్నత పాఠశాల. ఇంతటి ప్రత్యేకలు సొంతం చేసుకున్న ఈ విద్యాలయం.. జగన్‌ ప్రభుత్వం తెచ్చిన 117 జీవో, విలీన ప్రక్రియ కారణంగా మూతపడింది. ఎందరో విద్యావంతుల్ని అందించిన పాఠశాల కీర్తి ప్రతిష్టలు ఒక్క జీవోతో ఇకపై చరిత్రగానే మిగిలిపోనుంది.

ఉమ్మడి గుంటూరు జిల్లా మొదటి హైస్కూల్​: తెనాలి తాలూకా హైస్కూల్ ఉత్తమ విద్యా సంస్థగా ఎంతోమంది ప్రముఖుల మన్ననలను అందుకుంది. ఉమ్మడి గుంటూరు జిల్లాలోనే మొదటి ఉన్నత పాఠశాలగా గుర్తింపు పొందింది. తెనాలి పరిసర ప్రాంతాల పిల్లలు చదువుకునేందుకు పడుతున్న ఇబ్బందులు చూసి పట్టణానికి చెందిన కొందరు దాతలు ముందుకు వచ్చి స్థలాన్ని కేటాయించారు. ప్రభుత్వం పాఠశాల భవనం నిర్మించడానికి నిధులిచ్చింది. ఎట్టకేలకు ఏడుగురిని ట్రస్టీలుగా ఏర్పాటు చేసి, 1903లో పాఠశాలను నిర్మించారు. అలా ఏర్పాటైన తెనాలి తాలుకా హైస్కూల్ అనతి కాలంలోనే నాణ్యమైన బోధనతో ఉత్తమ పాఠశాలగా గుర్తింపు తెచ్చుకుంది. ఫలితంగా ఆ పాఠశాలలో ప్రవేశానికి తీవ్ర పోటీ ఉండేది.

ఎందరో మహనీయులు ఇక్కడి నుంచే: తెనాలిలో తాలుకా హైస్కూల్​ది కీలకపాత్రే అని విద్యావేత్తలు చెబుతుంటారు. 1965లో ప్రభుత్వం తాలుకా జూనియర్ కళాశాలను ఏర్పాటు చేయడంతో.. ఈ విద్యా సంస్థ ఖ్యాతి మరింతగా విస్తరించింది. సూపర్ స్టార్ కృష్ణ, మహర్షి రాఘవ, ఉమ్మడి ఆంధ్రప్రదేశ్‌ స్పీకర్‌ నాదెండ్ల మనోహర్‌ లాంటి ప్రముఖులు ఈ విద్యాసంస్థల్లోనే ఓనమాలు దిద్దారు.

ప్రభుత్వ చర్యలతో ఇలా: తాలుకా హైస్కూల్, జూనియర్ కళాశాల ఉపాధ్యాయులు, అధ్యాపకులు, ఇతర సిబ్బందికి ప్రభుత్వమే జీతాలు, పింఛన్లు చెల్లించేది. ఆ తరువాత పాలకులు ఎయిడెడ్ విద్యాసంస్థలపై శీతకన్ను వేయడంతో ఇతర పాఠశాలల మాదిరి తెనాలి తాలుకా హైస్కూల్​కు ఇబ్బందులు తలెత్తాయి. ఉపాధ్యాయుల నియామకాలు చేపట్టకపోవడం, మరోవైపు ప్రైవేట్ పాఠశాలల పోటీ పెరగడంతో.. క్రమంగా ఈ పాఠశాలలో విద్యార్థుల సంఖ్య తగ్గింది.

ముగిసిపోనున్న 12 దశాబ్దాల చరిత: గతంలో మూడు వేలకు పైగా విద్యార్థులుండేవారు. ప్రస్తుతం ఆ సంఖ్య ప్రభుత్వ చర్యలతో 65కి చేరింది. వైసీపీ ప్రభుత్వం కొత్తగా తెచ్చిన 117 జీవో వల్ల అరకొరగా ఉన్న ఉపాధ్యాయులు.. ఇతర పాఠశాలలకు బదిలీ కావడంతో ఈ పాఠశాలలో కొత్తగా విద్యార్థులు చేరలేదు. దీంతో ఉన్న కొద్ది మంది విద్యార్థుల్ని సమీప పాఠశాలకు తరలించారు. ఫలితంగా 12 దశాబ్దాలు సేవలందించిన పాఠశాలగా చరిత్ర ఉన్న తెనాలి తాలుకా హైస్కూల్ అర్థాంతరంగా మూతపడింది.

పూర్వ వైభవం తీసుకురావాలి: మరోవైపు కమిటీల్లోని ఓ వర్గం పాఠశాలను ప్రైవేట్ ఆస్తిగా చూపుతూ విక్రయించడానికి ప్రయత్నిస్తున్నారని విమర్శలు వెలుగుచూశాయి. జగన్ సర్కార్ కావాలనే ప్రభుత్వ పాఠశాలల్ని నిర్వీర్వం చేయడానికి విలీన ప్రక్రియకు శ్రీకారం చుట్టిందనే విమర్శలు సైతం వెల్లువెత్తుతున్నాయి. తెనాలి తాలుకా విద్యాసంస్థలకు పూర్వ వైభవం తెచ్చేందుకు తమ వంతు కృషి చేయడంతో పాటు ప్రజలందరు కలిసి రావాలని జనసేన పీఏసీ ఛైర్మన్‌ నాదెండ్ల మనోహర్ కోరారు.