TDP HOUSE ARREST:గుంటూరు జిల్లా తాడికొండ మండలం కంతేరులో తెలుగుదేశం పార్టీ సానుభూతిపరురాలైన వెంకాయమ్మపై వైకాపా కార్యకర్తల దాడిని నిరసిస్తూ.. ఆ పార్టీ చలో కంతేరుకు పిలుపునివ్వడంతో అప్రమత్తమైన పోలీసులు భారీగా సిబ్బందిని మోహరించారు. తాడికొండ, కంతేరులో భారీగా పోలీసు బందోబస్తు ఏర్పాటు చేశారు. గుంటూరు తెదేపా కార్యాలయం నుంచి చలో కంతేరు కార్యక్రమం చేపట్టగా.. తెదేపా పొలిట్‌బ్యూరో సభ్యుడు నక్కా ఆనంద్‌బాబును గృహనిర్బంధం చేశారు. బయటకు రాకుండా అడ్డుకున్నారు. పోలీసులు తీరును తప్పుబట్టిన నక్కా ఆనంద్‌బాబు.. ఎలాగైనా కంతేరు వెళ్తామన్నారు.
తాడేపల్లిలో తెదేపా నేత తెనాలి శ్రావణ్ కుమార్ ను పోలీసులు గృహనిర్బంధం చేశారు అనుమతి లేకుండా బయటికి వెళ్లరాదంటూ సిఐ శ్రావణ్ కు తేల్చి చెప్పారు. పార్టీ కార్యాలయానికి వెళ్తుంటే అడ్డుకోవడానికి మీరు ఎవరని.. తెనాలి శ్రావణ్కుమార్ పోలీసులను ప్రశ్నించారు. కార్యాలయానికి పోవడం తన హక్కు అన్నారు. కంతేరు వెళ్లకుండా కృష్ణా-గుంటూరు జిల్లా తెలుగుదేశం నేతలను పోలీసులు ఎక్కడికక్కడ గృహానిర్భంధం చేస్తున్నారు. విజయవాడలో దేవినేని ఉమా, నందిగామ లో తంగిరాల సౌమ్య లను గృహ నిర్బంధం చేసారు. గుంటూరు జిల్లాలో తెలుగుదేశం నేతలు ఎక్కడికక్కడ గృహ నిర్బంధం చేశారు.