గుంటూరు జిల్లా నరసరావుపేట ఏరియా ప్రభుత్వ వైద్యశాలలో ఏర్పాటుచేసిన వైరాలజీ ప్రయోగశాల సందర్శనకు వచ్చిన తెదేపా నియోజకవర్గ సమన్వయకర్త డాక్టర్‌ అరవిందబాబును శనివారం పోలీసులు అడ్డుకున్నారు. ఆసుపత్రిలోకి ఇతరులు ఎవర్నీ అనుమతించమని పోలీసులు ఆయన్ను గేటు బయటే నిలిపివేశారు. తాను స్వయంగా పరీక్ష చేయించుకొని ప్రయోగశాల ఉపయోగాలను ప్రజలకు తెలియచెప్పేందుకు వచ్చానని.., తనతో ఎవరూ రారని.. తానొక్కడినే లోపలికి వెళ్తానని అడగ్గా అందుకు పోలీసులు నిరాకరించారు.
రెడ్జోన్ పరిధిలో ఉన్న ఆసుపత్రిలోకి ఎవర్నీ పంపమని పోలీసులు స్పష్టం చేశారు. దీంతో అరవిందబాబు పోలీసుల తీరుపై అసహనం వ్యక్తం చేశారు. పోలీసుల తీరును ఖండిస్తూ ఆసుపత్రి సమీపంలోని దుకాణాల ఎదుట ఆయన బైఠాయించారు. ఈ నేపథ్యంలో పోలీసులు దురుసుగా వ్యవహరించటంతో ఐజీ ప్రభాకరరావుకు ఫోన్‌ద్వారా ఫిర్యాదు చేశారు. ప్రజల ఆరోగ్యానికి సంబంధించిన అంశంపై పరిశీలించేందుకు వస్తే స్థానిక పోలీసులు వ్యవహరించిన తీరు బాగాలేదన్నారు.