SC FIRES ON IAS OFFICER SRIALXMI : జగన్‌ అక్రమాస్తుల కేసులో భాగంగా దాల్మియా సిమెంట్‌కు సున్నపురాయి గనుల కేటాయింపు వ్యవహారంలో ఐఏఎస్ అధికారిణి శ్రీలక్ష్మి విచారణను ఎదుర్కోవాల్సిందేనని సుప్రీంకోర్టు స్పష్టం చేసింది. హైకోర్టు తీర్పు ఇచ్చిన మూడేళ్ల తర్వాత దానిని సవాలు చేస్తూ పిటిషన్ వేయడం ఏమిటంటూ ఆమెపై ఆగ్రహం వ్యక్తం చేసింది. సున్నపురాయి గనుల కేటాయింపులో శ్రీలక్ష్మిపై కొన్ని సెక్షన్ల కింద దాఖలైన కేసులను కొట్టివేస్తూ తెలంగాణ హైకోర్టు ఇచ్చిన తీర్పును సవాల్‌ చేస్తూ సీబీఐ దాఖలు చేసిన పిటిషన్‌ను, మరికొన్ని సెక్షన్ల కింద విచారణను ఎదుర్కోవాలని హైకోర్టు 2017లో ఇచ్చిన తీర్పును సవాల్‌ చేస్తూ శ్రీలక్ష్మి.. సుప్రీంకోర్టులో వేర్వేరుగా పిటిషన్లను దాఖలు చేశారు.
జస్టిస్‌ ఎస్‌.రవీంద్రభట్‌, జస్టిస్‌ దీపాంకర్‌ దత్తాతో కూడిన ద్విసభ్య ధర్మాసనం పిటిషన్లను సోమవారం విచారించింది. సీబీఐ తరఫున అదనపు సొలిసిటర్‌ జనరల్‌(ఏఎస్జీ) ఐశ్వర్య భాటి వాదనలు వినిపించారు. అవినీతి నిరోధక చట్టం కింద నమోదైన కేసులో శ్రీలక్ష్మిని విచారించేందుకు ప్రభుత్వ అనుమతి తీసుకున్నట్లు తెలిపారు. ఈ కేసులో ఇప్పటికే 13 ఛార్జిషీట్లు ఉన్నాయని.. ఐపీసీలోని ఇతర సెక్షన్ల కింద విచారణకు ప్రభుత్వ అనుమతి అవసరం లేదన్నారు. ఇతర నిందితులతో కుమ్మక్కై శ్రీలక్ష్మి తన అధికారాన్ని దుర్వినియోగం చేశారని పేర్కొన్నారు. నిబంధనలు అంగీకరించవని తెలిసినా ఉద్దేశపూర్వకంగానే 407 హెక్టార్లలోని సున్నపురాయి గనులపై జయా మినరల్స్‌కు లైసెన్సులు ఇవ్వాలని సంబంధిత మంత్రికి దస్త్రాన్ని పంపారని తెలిపారు.
సరైన తనిఖీలు నిర్వహించకుండానే లైసెన్సులు మంజూరు చేశారన్నారు. జయా మినరల్స్‌ నుంచి ఈశ్వర్‌ సిమెంట్‌కు లైసెన్సులు బదిలీ అయ్యాయి అని ధర్మాసనానికి ఏఎస్జీ తెలిపారు. ఈ దశలో జోక్యం చేసుకున్న జస్టిస్‌ ఎస్‌.రవీంద్రభట్‌.. అసలు ఆమె విధులు ఏమిటి? ఏ చట్టం ప్రకారం అలా చేశారు? అని ప్రశ్నించారు. ఏఎస్జీ స్పందిస్తూ.. అవన్నీ విచారణ సమయంలో తెలుస్తాయని తెలిపారు. ఈ కేసులో 13 మంది నిందితులు ఉన్నారని, వారంతా కలిసి కుట్రకు పాల్పడ్డారని ధర్మాసనానికి వివరించారు. అయితే లైసెన్సుల బదిలీ నిబంధనలకు విరుద్ధమైనప్పుడు అక్రమం అవుతుందే తప్ప కుట్ర ఏముందని జస్టిస్‌ రవీంద్ర భట్‌ ప్రశ్నించారు. ప్రస్తుత పిటిషన్ ప్రాసిక్యూషన్‌కు ప్రభుత్వ అనుమతి పైనే తప్ప దర్యాప్తు విషయంలో కాదని ఏఎస్జీ తెలిపారు. పిటిషన్ ఉపసంహరించుకునేందుకు అనుమతించాలని శ్రీలక్ష్మి తరఫు న్యాయవాది విన్నపం మేరకు ఈ కేసు విచారణను సుప్రీంకోర్టు ముగించింది.
హెటిరోకి సైతం సుప్రీంలో చుక్కెదురు: సీఎం జగన్‌ అక్రమాస్తుల కేసులో హెటిరో గ్రూపు సంస్థలకు సుప్రీం కోర్టులో చుక్కెదురైంది. తమపై దాఖలైన కేసును కొట్టివేయాలంటూ హెటిరో సంస్థలు వేసిన పిటిషన్‌ను ధర్మాసనం తోసిపుచ్చింది. ఈ కేసు విషయమై క్వాష్‌ పిటిషన్‌ను ఇప్పటికే సీబీఐ కోర్టు, తెలంగాణ హైకోర్టు నిరాకరించింది. అయితే, హైకోర్టు నిర్ణయాన్ని సవాల్‌ చేస్తూ హెటిరో గ్రూపు సంస్థలు సుప్రీంకోర్టును ఆశ్రయించాయి. ఈ పిటిషన్‌పై గత సంవత్సరం నవంబర్17న విచారణ చేపట్టిన సుప్రీం ధర్మాసనం.. హెటిరో కేసు విచారణను ఎదుర్కోవాల్సిందేనని స్పష్టం చేసింది.
ఇవీ చదవండి:
