అన్నగారి ఆశయ సాధనకు చంద్రన్న కృషి!

గుంటూరులో తెలుగుదేశం పార్టీ ఆవిర్భావ దినోత్సవానికి మంత్రి నక్కా ఆనంద్ బాబు, ఎంపీ గల్లా జయదేవ్ హాజరయ్యారు. నిరుపేదల సంక్షేమం, అభివృద్ధే లక్ష్యంగా ఆనాడు అన్న ఎన్టీఆర్.. మెరుగైన పాలనకు శ్రీకారం చుట్టారని... ఇప్పుడు ఎన్టీఆర్ ఆశయ సాధనకు ముఖ్యమంత్రి చంద్రబాబు కృషి చేస్తున్నారని నేతలు పేర్కొన్నారు.

గుంటూరు తెదేపా కార్యాలయంలో తెలుగుదేశం పార్టీ38వ ఆవిర్భావ దినోత్సవాలు అట్టహాసంగా జరిగాయి. మంత్రి నక్కా ఆనంద్ బాబు, ఎంపీ గల్లా జయదేవ్ సహా పలువురు నేతలు ఎన్టీఆర్ విగ్రహానికి పూలమాలలు వేసి నివాళి అర్పించారు. తెలుగు ప్రజల ఖ్యాతిని ప్రపంచ నలుమూలల చాటి చెప్పిన మహానాయకుడు నందమూరి తారకరామారావు అని మంత్రి నక్కా ఆనంద్ బాబు కొనియాడారు. తెలుగుదేశం పార్టీని స్థాపించిన 9 నెలల్లోనే అధికారంలోకి తీసుకువచ్చిన గొప్ప నేత అని గుర్తు చేశారు. తెలుగు వారి ఆత్మగౌరవం కాపాడడానికి ఏర్పాటు చేసిన పార్టీ.... తెలుగుదేశం పార్టీ అని గల్లా జయదేవ్ అన్నారు. రాష్ట్ర అభివృద్ధి జరగాలంటే మరోసారి చంద్రబాబుముఖ్యమంత్రి కావాల్సిన అవసరం ఉందన్నారు.