హేతుబద్దీకరణలో భాగంగా ప్రభుత్వం ఈ ఏడాది ఫిబ్రవరి 29 నాటికి ఆయా పాఠశాలల్లో ఉన్న విద్యార్థుల సంఖ్యను బట్టి ఉపాధ్యాయులను కేటాయించాలని నిర్ణయించింది. ప్రస్తుతం ఆయా పాఠశాలల్లో పెక్కుసంఖ్యలో విద్యార్థులు చేరడంతో నవంబరు 2 వరకు చేరిన విద్యార్థులను ప్రామాణికంగా తీసుకునేలా ప్రభుత్వం తాజాగా మార్పులు చేసింది. దీనికి అనుగుణంగా జిల్లావిద్యాశాఖ ఆయా పాఠశాలల్లో చేరిన విద్యార్థులందరి వివరాలను చైల్డ్‌ఇన్‌ఫోలో నమోదు చేయాలని ఎమ్యీవోలకు ఆదేశాలు జారీ చేసింది. ఒక విద్యార్థి పాఠశాలలో కొత్తగా చేరినా, లేదా ఒక పాఠశాలనుంచి మరోదానికి మారినా వారి డేటాను కూడా నమోదు చేయాల్సిన బాధ్యత పాఠశాల ప్రధానోపాధ్యాయులు, ఎమ్యీవోలదేనని ఉత్తర్వుల్లో స్పష్టం చేశారు. ప్రభుత్వం నిర్దేశించిన సమయంలోపు విద్యార్థుల వివరాలన్నింటినీ నమోదు చేయాల్సి ఉంది.
టీసీ లేకున్నా ఇబ్బంది లేదు
ప్రయివేటు పాఠశాలల నుంచి ప్రభుత్వ పాఠశాలల్లో చేరిన విద్యార్థులకు యాజమాన్యాలు టీసీలు ఇవ్వకపోవడంతో చైల్డ్‌ఇన్‌ఫోలో నమోదు చేయలేక పోతున్నామని ఉపాధ్యాయులు అధికారుల దృష్టికి తీసుకు వెళ్లారు. దీంతో టీసీ లేని విద్యార్థుల నుంచి తల్లిదండ్రుల అంగీకారపత్రంతో నమోదు చేసుకునేలా వెసులుబాటు కల్పించారు. తల్లిదండ్రుల అంగీకారం తీసుకునేందుకు ప్రత్యేక పత్రాన్ని రూపొందించి ఉపాధ్యాయులకు అందజేశారు. ఉపాధ్యాయులు ఆ అంగీకార పత్రాలను మండల విద్యాశాఖ అధికారులకు అందజేయాల్సి ఉంటుంది. ఎమ్యీవోలు అందరూ తమ మండల పరిధిలో తల్లిదండ్రుల డిక్లరేషన్‌తో చేరిన విద్యార్థుల వివరాలను చైల్డ్‌ఇన్‌ఫో సైట్‌లోని డ్రాప్‌బాక్సులో పెట్టాలని సూచించారు. ఇలా ప్రభుత్వ పాఠశాలల్లో చేరిన విద్యార్థులందరి వివరాలను చైల్‌ఇన్‌ఫోలో నమోదుచేయడానికి ఏర్పాట్లు చేశారు. ఈ ప్రక్రియ పూర్తయిన తరువాత హేతుబద్ధీకరణ జరుగుతుందని అధికారులు చెబుతున్నారు.