కృష్ణా నదిపై రెండు కొత్త బ్యారేజీలు
ప్రకాశం బ్యారేజీకి దిగువన కృష్ణా నదిపై రెండు బ్యారేజీల నిర్మాణానికి గత సెప్టెంబర్‌లో రాష్ట్ర మంత్రివర్గం నిర్ణయించింది. వరదల సమయంలో సముద్రంలోకి వృథాగా వెళ్లే నీటికి అడ్డుకట్ట వేయటంతో పాటు డెల్టా భూములు ఉప్పు బారకుండా పరిరక్షించేందుకు ఈ ప్రాజెక్టులు నిర్మిస్తున్నట్టు ప్రకటించింది. ప్రకాశం బ్యారేజీకి 12 కిలోమీటర్ల దిగువన ఒకటి, 62 కిలోమీటర్ల దిగువన మరొక బ్యారేజీ రానుంది. రెండున్నర వేల కోట్ల అంచనా వ్యయంతో నిర్మించే ఈ ప్రాజెక్టుల వల్ల సమీప ప్రాంతాల్లో భూగర్భ జలాలు పెరుగుతాయని ప్రభుత్వం భావిస్తోంది. బ్యారేజీల వల్ల పర్యావరణం ఏమేరకు ప్రభావితమవుతుందనే అంశంపై అధ్యయనం చేసి నివేదిక ఇవ్వాలని నాగార్జున వర్సిటీ నిపుణుల బృందాన్ని కోరింది. ఎన్జీటీ నుంచి ఎలాంటి అభ్యంతరాలు రాకుండా ఉండాలంటే ఈ నివేదిక కీలకం కానుంది.