గుంటూరు జిల్లా దాచేపల్లికి చెందిన వ్యక్తికి(46) కరోనా నిర్ధరణ కావటంతో తొలుత నరసరావుపేట ప్రభుత్వ ఆసుపత్రిలో చేర్పించారు. గురువారం రాత్రి వ్యాధి తీవ్రం కావటంతో చిలకలూరిపేట క్వారంటైన్‌ కేంద్రానికి తీసుకెళ్లారు.
అక్కడి వైద్యులు మెరుగైన చికిత్స కోసం శుక్రవారం ఉదయం 108 వాహనంలో జీజీహెచ్‌కు పంపారు. కొవిడ్‌ వార్డులోకి తరలించి వైద్యం అందించాలని సిబ్బందికి మొరపెట్టుకున్నా పట్టించుకోలేదని కుటుంబసభ్యులు వాపోయారు. స్ట్రెచర్‌, వీల్‌ఛైర్‌ అందుబాటులో లేకపోవడంతో తామే చెరో చేయి పట్టుకొని పాత ఆసుపత్రి మూడో అంతస్తులోని వార్డులోకి మెట్ల మీద నడిపించుకుంటూ తీసుకొచ్చామని తెలిపారు. అంతలోనే అతడి పరిస్థితి విషమించి మెట్లుమీదే కుప్పకూలి, తమ కళ్లముందే ప్రాణాలు కోల్పోయాడని బాధితుడి బంధువులు విలపించారు.