తూర్పుగోదావరి జిల్లా అమలాపురం నియోజకవర్గం ఉప్పలగుప్తం మండలం చల్లపల్లిలో ఆయిల్ ట్యాంకర్ ఢీకొని ఓ రైతు మృతి చెందాడు. చల్లపల్లికి చెందిన పేరాబత్తుల వెంకట సత్యనారాయణ (55) పొలం పనులు ముగించుకుని సైకిలుపై ఇంటికి చేరుకుంటున్న సమయంలో ఎస్.యానం నుంచి అమలాపురం వైపు వస్తున్న ఆయిల్ ట్యాంకర్ రైతు సత్యనారాయణను వెనుకనుండి ఢీ కొట్టింది. దీంతో సత్యనారాయణకు తీవ్ర గాయాలై అక్కడికక్కడే ప్రాణాలు విడిచాడు.
సంఘటన జరిగిన ప్రదేశానికి కూతవేటు దూరంలోనే సదరు రైతు సత్యనారాయణ ఇల్లు ఉంది. మరో రెండు నిమిషాల్లో ఇంటికి చేరుకుంటాడనగా.. ఇలా ప్రమాదం రూపంలో ఆయన మరణించడంతో కుటుంబసభ్యులు శోకసంద్రంలో మునిగిపోయారు. స్థానికులు సైతం దీనిపై దిగ్భాంతి వ్యక్తం చేస్తున్నారు. బాధిత కుటుంబానికి న్యాయం చేయాలని డిమాండ్ చేస్తూ.. ప్రమాదానికి కారణమైన ఆయిల్ ట్యాంకర్ను అడ్డుకున్న గ్రామస్తులు రోడ్డుపైనే బైఠాయించి ఆందోళనకు దిగారు.