తూర్పుగోదావరి జిల్లా అనపర్తిలోని ఓ వృద్ధుడు కరోనా వ్యాధి రావడంతో రాజానగరం జీఎస్‌ఎల్‌ క్వారంటైన్లో చికిత్స పొందుతూ బుధవారం మృతి చెందాడు. మృతదేహానికి అంత్యక్రియలు నిర్వహించేందుకు రాజమహేంద్రవరం రోటరీ శ్మశానవాటికకు అంబులెన్స్లో తీసుకొచ్చారు. విషయం తెలుసుకున్న స్థానికులు శ్మశాన వాటిక వద్ద కాపు కాసి నిరసన తెలిపారు.
మృతదేహాన్ని ఇక్కడ ఖననం చేయవద్దంటూ కొందరు యువకులు అంబులెన్స్ను అడ్డుకున్నారు. విషయం తెలుసుకున్న పోలీసులు, రెవెన్యూ అధికారులు శ్మశానవాటిక వద్దకు వచ్చి ఆందోళనకారులకు సద్దిచెప్పే ప్రయత్నం చేశారు. అయినా వారు వినలేదు. కొద్దిసేపు పోలీసులు, స్థానికులకు వాగ్వాదం జరిగింది. నిబంధనల ప్రకారమే అంత్యక్రియలు చేస్తున్నట్లు అధికారులు స్థానికులకు వివరించారు. అనంతరం మృతదేహానికి అంతిమ సంస్కారాలు నిర్వహించారు.