సమయం లేదు మిత్రమా.. ఓటు నమోదు చేసుకో!

ఎన్నికల తేదీలు ఖరారయ్యాయి. ఇంకో నెలే సమయం ఉంది. ఓట్లు గల్లంతైన వాళ్లు.. ఇప్పటికీ ఓటు హక్కు లేని వాళ్లు.. జాబితాలో తమ పేరు నమోదు చేసుకునేందుకు ఎన్నికల సంఘం మరో అవకాశం ఇచ్చింది.

రాష్ట్ర ప్రజలారా... సార్వత్రిక ఎన్నికలకు నగారా మోగింది. మరి మీ ఓటు ఉందో లేదో చూసుకున్నారా...? ఒకవేళ ఓటరు జాబితాలో మీ ఓటు లేకపోతే తక్షణమే నమోదు చేసుకోండి. మర్చిపోకండి. ఓటు దరఖాస్తుకు ఈనెల 15వ తేదీ వరకే అవకాశం. ఆన్‌లైన్​లో, మీసేవ కేంద్రాల్లో, ఎన్నికల సంఘం వెబ్‌సైట్‌ ceoandhra.nic.in లో ఓటు నమోదు చేసుకోవచ్చు.

ఫామ్‌-6 దరఖాస్తుపై క్లిక్‌ చేసి వివరాలు నింపండి. ఫామ్‌-6ను ఆన్‌లైన్‌లో గానీ, NVSP వెబ్‌సైట్‌ ద్వారా గానీ, ఎలక్షన్‌ కమిషన్‌ (ఈసీ) యాప్‌ ద్వారా గానీ దరఖాస్తు చేసుకోవచ్చు. ఓటరు నమోదుకు గుర్తింపు పత్రం, చిరునామా పత్రం, కలర్‌ ఫొటో తప్పనిసరి అని గుర్తుంచుకోండి. ఇంకా ఏమైనా సందేహాలు ఉంటే టోల్‌ఫ్రీ నెంబర్‌ 1950ను సంప్రదించడం మర్చిపోకండి.

మీ విలువైన ఓటే ప్రజాస్వామ్యానికి ఆయువుపట్టు.