జగన్పై మాజీ ఎంపీ సంచలన ఆరోపణలు మాజీమంత్రి వైఎస్ వివేకానందరెడ్డి మరణం ద్వారా జగన్ సానుభూతి పొందాలని చూస్తున్నారని రాజమహేంద్రవరం మాజీ ఎంపీ జి.వి. హర్షకుమార్ పేర్కొన్నారు. వివేకా మరణానంతర పరిణామాలపై ఫేస్బుక్లో కామెంట్లు పోస్ట్ చేశారు. జగన్మోహన్రెడ్డి తన బాబాయి వివేకాపై రెండుసార్లు చేయి చేసుకున్నారని.. ఈ విషయం అప్పటి ఎంపీలందరికీ తెలుసని ఆ పోస్టులో వెల్లడించారు. 2006లో వివేకానందరెడ్డి రాజీనామా విషయంలో జరిగిన సంఘటనను వివరించారు. వివేకా ఎవరికీ తెలియకుండా స్పీకర్ సోమనాథ్ ఛటర్జీ వద్దకు వెళ్లి రాజీనామా చేశారని చెప్పారు. దానిపై సోనియాగాంధీ పిలిపించి మాట్లాడగా... 'ఆ సీటు మా నాన్న రాజశేఖర్ రెడ్డిదని.. నువ్వు ఎంతకాలం ఉంటావ్ అని జగన్ తనపై చేయి చేసుకున్నట్లు' వివేకా తెలిపారన్నారు. వెంటనే సోనియా రాజశేఖర్రెడ్డికి ఫోన్ చేసి తన కొడుకును అదుపులో పెట్టుకోవాలనీ... లేకపోతే అతనికి సీటు ఇవ్వనని హెచ్చరించారని తెలిపారు. ఈ విషయాలన్నీ అప్పటి రాష్ట్ర ఎంపీలందరికీ తెలుసని ఫేస్బుక్ పోస్టులో హర్షకుమార్ వివరించారు.
