డేటా వివాదంపై దర్యాప్తు వేగం

డేటా చోరీపై సిట్ బృందం దర్యాప్తు వేగం చేసింది. సమాచార చౌర్యానికి కుట్ర ఎలా జరిగిందనే విషయంపై లోతుగా విశ్లేషిస్తున్నారు. సాంకేతిక పరిజ్ఞానం వినియోగించి విచారణ చేస్తున్నారు. సమాచారం క్లౌడ్ నుంచి ఎవరు తస్కరించారు... ఇలా... ఒక్కో అంశాన్ని గుర్తిస్తూ... నేరానికి పాల్పడిన వారిని పట్టుకుంటామని సిట్ అధికారులు చెబుతున్నారు.

సమాచార దొంగతనం... ఇప్పుడు రెండు తెలుగు రాష్ట్రాల్లో చర్చనీయాంశంగా మారింది. తెలుగుదేశం పార్టీకి చెందిన డేటా... చోరీ జరిగిందని ఆ పార్టీ రాష్ట్ర అధ్యక్షుడు కళా వెంకట్రావ్ ఫిర్యాదు ఇచ్చారు. కేసు నమోదు చేసిన పోలీసులు... సిట్ ఏర్పాటు చేశారు. సిట్ బృందం డేటా చోరీ కేసును లోతుగా విశ్లేషిస్తుంది. తెదేపాకు చెందిన సమాచారం మొదట ఎక్కడ నుంచి ఎవరికి వెళ్లింది అనే కోణంలో దర్యాప్తు చేస్తున్నారు.

సమాచార చోరీకి కుట్ర జరిగిందా... చౌర్యానికి ముందు నిందితులు సమావేశాలు నిర్వహించారా అని ఆరాతీస్తున్నారు. డిజిటల్ వేదికల నుంచి సమాచారాన్ని ఏ విధంగా డౌన్​లోడ్ చేసుకున్నారు... దీనికి సంబంధించిన ఆధారాలు సేకరిస్తున్నారు. ఒక చోట నుంచి సమాచారం డౌన్​లోడ్ చేసుకున్నా.. చూసినా... తొలగించినా... ఆ వివరాలన్నీ సంబంధిత క్లౌడ్​లో నమోదవుతాయి.

తెదేపా సమాచారం ఏ సంస్థ క్లౌడ్​లో ఉంది... దాన్ని ఎవరు.. ఎప్పుడు... ఏ ఐపీ అడ్రస్​ల నుంచి తీసుకున్నారనే అంశాలను పరిశీలిస్తున్నారు. ఆయా సంస్థలకు రెండు రోజుల్లో లేఖ రాయనున్నారు. వాటి నుంచి వివరాలు వస్తే... సమాచారం ఎక్కడ నుంచి ఎవరికి వెళ్లిందనే విషయం తెలుస్తుందని సిట్ అధికారులు భావిస్తున్నారు. డేటా చోరీలో ప్రభుత్వాధికారుల పాత్ర ఏమైనా ఉందా... అనే కోణంలోనూ దర్యాప్తు చేస్తున్నారు. మంగళగిరిలోని ఏపి పోలీసు ప్రధాన కార్యాలయంలో సమావేశమై పని విభజనపై చర్చించారు.

ఇదీ చదవండి...

ఫారం-7 దుర్వినియోగం తొలిసారే