మట్టి గణపయ్య... పర్యావరణానికి మేలు చేసేనయ్యా

ఈటీవీ భారత్-ఈనాడు ఆధ్వర్యంలో రాష్ట్రంలోని పలు పాఠశాలల్లో మట్టి గణపయ్యలపై అవగాహన కార్యక్రమం నిర్వహించారు. విద్యార్థులతో మట్టి గణపతి ప్రతిమలను తయారు చేయించారు. ప్రతిభ చూపిన వారికి బహుమతులు అందించారు.

ఈటీవీ భారత్-ఈనాడు ఆధ్వర్యంలో రాష్ట్రంలోని పలు చోట్ల మట్టి గణనాధులు తయారీపై అవగాహన కార్యక్రమానికి అనూహ్య స్పందన వచ్చింది.

అనంతపురం జిల్లా....
ఉరవకొండలోని కస్తూరిబా బాలికల పాఠశాలలో జరిగిన మట్టి విగ్రహాల తయారీ కార్యక్రమంలో విద్యార్దులు భారీగా హజరయ్యారు. మట్టి వినాయకుడితో పర్యావరణాన్ని పరిరక్షించవచ్చని, రసాయనలతో తయారు చేసే గణనాధులతో కాలుష్యం ఏర్పడుతుందని వక్తలు తెలిపారు. ప్రతిమల తయారీలో ప్రతిభ చూపిన విద్యార్థినులకు బహుమతులను అందించి, విద్యార్దినులను అభినందించారు.

పెనగొండలోని గ్లోబల్ జెన్ పాఠశాలలోనూ మట్టి గణపయ్యలపై విద్యార్థులకు అవగాహన కల్పించారు. స్కూల్ కరస్పాండెంట్ శ్రీనివాసులు మట్టి వినాయకులు ఏ విధంగా పర్యావరణహితంగా ఉంటాయో తెలియజేశారు.

రాప్తాడు మండలం హంపాపురంలో హార్టికల్చర్ డిప్లమో విద్యార్థులు మట్టి వినాయకుడు తయారు కార్యక్రమం నిర్వహించారు. ఇందులో భాగంగా విద్యార్థులు చెరువుకు వెళ్లి బంకమట్టి తీసుకువచ్చి మట్టి వినాయకులను అందంగా తయారు చేశారు.

కర్నూలు జిల్లా..
డోన్ మండలం ధర్మవరం ప్రభుత్వ పాఠశాలలోనూ మట్టి విగ్రహాలపై విద్యార్థులకు అవగాహన సదస్సు నిర్వహించారు. మట్టి విఘ్నేశ్వరుని వల్ల కలిగే ప్రయోజనాలను ప్రధానోపాధ్యాయురాలు వరలక్ష్మి వివరించారు.

ఇవీ చూడండి-'తిందామంటే తిండి లేదు..చేద్దామంటే కూలీ లేదు'