YSR CONGRESS: ఉరవకొండ వైకాపాలో వర్గ విభేదాలు.. వరద సాయంలో మాటల యుద్ధం

disputes in ycr congress: ఉరవకొండ నియోజకవర్గంలో మరోసారి వైకాపాలో వర్గ విబేధాలు బయటపడ్డాయి. మాజీ ఎమ్మెల్యే విశ్వేశ్వరరెడ్డి, ఎమ్మెల్సీ శివరామిరెడ్డి వర్గాల మధ్య మాటల యుద్దం నడుస్తోంది. జీడిపల్లిలో వరద సహాయం కొందరికి ఇవ్వకపోవడంపై మాజీ ఎమ్మెల్యేను గ్రామస్థులు ప్రశ్నించారు.

disputes in ysr congress: అనంతపురం జిల్లా ఉరవకొండ నియోజకవర్గంలో వర్గ విభేదాలు మరోసారి భగ్గుమన్నాయి. ఉరవకొండ పట్టణంలోని శివరామిరెడ్డి కాలనీలో మాజీ ఎమ్మెల్యే విశ్వేశ్వరరెడ్డి, ఎమ్మెల్సీ శివరామిరెడ్డి వర్గీయుల మధ్య మాటల యుద్ధం జరిగింది. కాలనీకి శివరామిరెడ్డి పేరు పెట్టినందుకు ఇక్కడ అభివృద్ధి జరగలేదని కొందరు అన్నారు. ఆ పేరు కాకుండా ఇంకొక పేరు పెట్టి ఉంటే అధికారులు ఎప్పుడో వచ్చి ఈ పాటికి సమస్యలు పరిష్కరించేవారని ఓ వర్గం నాయకులు అన్నారు. దాంతో మరో వర్గం వాళ్ళు తమ నాయకుడు మంచి చేశాడు కాబట్టే.. ఈ కాలనీ ప్రజలు అభిమానంతో ఆయన పేరు కాలనీకి పెట్టారని ఒకరికొకరు వాదించుకున్నారు.

అయితే శివరామిరెడ్డి కాలనీ వాసులు కొన్ని సంవత్సరాలుగా వరదల వల్ల తీవ్ర ఇబ్బందులు పడుతున్నారు. అక్కడ ఉన్న మురికి కాలువ వెడల్పు చేసి పూడికను తొలగించే పనులు చేస్తుండగా ఇరువర్గాల వాళ్ళు ఈ పనులన్నీ తామే చేస్తున్నామని కాలనీ ప్రజల ముందు మాటల యుద్ధానికి దిగారు.

వరద సాయం అందరికి ఇవ్వాలని కొందరు గ్రామస్థులు జీడిపల్లి గ్రామంలో వైకాపా మాజీ ఎమ్మెల్యే విశ్వేశ్వరరెడ్డిని ప్రశ్నించారు. ఈ క్రమంలో మాజీ ఎమ్మెల్యే విశ్వేశ్వరరెడ్డి, ఎమ్మెల్సీ శివరామిరెడ్డి వర్గాల మధ్య స్వల్ప ఘర్షణ చోటు చేసుకుంది. తమ వర్గం వారికి సాయం అందకుండా చేశారని మాజీ ఎమ్మెల్యే ముందు గొడవకు దిగారు.

వర్షాలకు తోడు రిజర్వాయర్ ఉట ఎక్కువ కావడంతో జీడిపల్లిలో ఉన్న అందరికీ రూ. 2000 తక్షణ సాయం అందించాలని ప్రభుత్వం ఆదేశించింది. సాయాన్ని పంపిణీ చేయడానికి గురువారం సాయంత్రం మాజీ ఎమ్మెల్యే విశ్వేశ్వర్ రెడ్డి వెళ్లారు. అయితే సుమారు 35 కుటుంబాలకు సహాయం ఇవ్వలేదని బాధితులు తెలిపారు. స్థానిక అధికారులు ఆర్అండ్ఆర్ ప్యాకేజీలో కుటుంబాల సంఖ్య తక్కువగా చూపి ఏకపక్షంగా వ్యవహరించడంతోనే కొందరికి సాయం అందలేదని ఆరోపించారు. దీంతో కార్యక్రమం ఘర్షణకు దారితీసింది. ఇరువర్గాల వారిని పోలీసులు అదుపు చేశారు.

ఇదీ చదవండి: