రికార్డుల్లోకి ఎక్కించకుండా ఎఫ్ డీ నగదు స్వాహా
అనంతపురం జిల్లా గుంతకల్లు ప్రాథమిక వ్యవసాయ సహకార పరపతి సంఘ కార్యాలయంలో అవినీతి చోటు చేసుకుంది. సహకార సంఘంలో అక్రమాలు జరిగాయని జిల్లా కో-అపరేటివ్ అధికార బృందం ఆకస్మికంగా తనిఖీ చేశారు. మండల పరిధిలోని కొట్టాలకు చెందిన శ్రీనివాసులు 2016లో ఎఫ్డీ చేసిన రూ.4 లక్షలు చెల్లించడంలో సొసైటీ అధికారులు జాప్యం చేస్తున్నారని.. బాధిత రైతు కలెక్టర్ను ఆశ్రయించారు. దాంతో జిల్లా కలెక్టర్ నలుగురు అధికారులతో విచారణ చేపట్టగా.. రికార్డుల్లో నమోదు చేయకుండా ఎఫ్డీ నగదు స్వాహా చేసినట్లు రుజువైంది. కానీ సొసైటీ అధ్యక్షుడు మల్లికార్జున తనకేమీ తెలియదని.. అప్పటి సంఘం సీఈఓ లక్ష్మీనారాయణ హయాంలోనే అవినీతి జరిగిందంటున్నారు. సంఘానికి చెడ్డ పేరు రాకుండా రైతుకు 3 నెలల వ్యవధిలోనే ఎఫ్డీ డబ్బులు వడ్డీతో సహా చెల్లిస్తామని అధికారులు లిఖితపూర్వకంగా రాసిచ్చారు.