కరోనా కష్టకాలంలోనూ ప్రభుత్వానికి మద్యం దుకాణాలే ముఖ్యమయ్యాయా అంటూ మహిళలు మండిపడ్డారు. వాటిని మూసేయాలంటూ రాష్ట్రంలో వివిధ చోట్ల నిరసనలు చేపట్టారు. విశాఖ నగరంలో మద్యం దుకాణాలు మూసేయాలంటూ తెలుగుదేశం మహిళా కార్యకర్తలు దుకాణాల ముందు బారులు తీరిన మందుబాబులు, పోలీసులకు దండం పెడుతూ వేడుకున్నారు. మద్యం అమ్మకాలు ఆపాలంటూ ఆరిలోవ తోటగరువులోని దుకాణం వద్ద మహిళలు ధర్నా చేశారు.
పశ్చిమగోదావరి జిల్లా జంగారెడ్డిగూడెంలో మారుతీనగర్‌లో ఉన్న దుకాణాన్ని తొలగించాలంటూ మహిళలు ఆందోళన చేశారు. నివాసాల మధ్య ఉండటంతో మహిళలు, యువతులపై ఆకతాయిల వేధింపులు ఎక్కువవుతున్నాయన్నారు.