ఆ తల్లి కష్టం చూస్తే.. కళ్లు చెమర్చాల్సిందే!

నవమాసాలు మోసిన ఆ తల్లి కడుపులోనే.. బిడ్డ మృతి చెందింది. మరో పక్క సకాలంలో వైద్యం అందకపోతే తన ప్రాణాలకే ముప్పని తెలిసిన ఆ బాలింత.. చికిత్స అందని దుర్భర పరిస్థితిలో ప్రత్యక్ష నరకం చూస్తోంది. కష్టపడి ఆసుపత్రికి వెళ్లినా.. ఎవరూ పట్టించుకునేవారు లేక.. బాధతో విలవిల్లాడుతోంది. విశాఖ మన్యంలో ఓ గర్భిణి పడిన ప్రసవవేదన కష్టాలు చూస్తే కళ్లు చెమర్చాల్సిందే.

విశాఖ మన్యంలో మరో హృదయ విదారక ఘటన వెలుగు చూసింది. కడుపులో మృత శిశువును దాచుకుని గంటల పాటు ప్రసవ వేదనతో ఓ గర్భిణి నిరీక్షించింది. విశాఖ ఏజెన్సీ హుకుంపేట మండలానికి చెందిన ఆ మహిళ పురిటి నొప్పులతో బాధపడుతుండగా.. కుటుంబీకులు స్థానిక ప్రాంతీయ ఆస్పత్రికి తరలించారు. అప్పటికే కడుపులో ఉన్న బిడ్డ మృతి చెందింది. మృత శిశువును వెలికితీసేందుకు సరైన వైద్య సదుపాయాలు లేని కారణంగా.. విశాఖ కేజిహెచ్​కు తరలించాలని వైద్యులు సూచించారు. తీరా తీసుకెళ్లాలనుకున్న సమయానికి అంబులెన్స్ అందుబాటులో లేకపోవటం.. గంటల సమయం వేచి చూడాల్సి రావడం.. ఆ మహిళకు ప్రత్యక్ష నరకం చూపించింది. బాధితురాలి పరిస్థితి గురించి ఐటీడీఏ అధికారులకు తెలియజేసినా స్పందన కరవైంది. ఆరు గంటల పాటు మహిళా వార్డులో ఉంచి తరువాత వైజాగ్ కేజీహెచ్ ఆస్పత్రికి తీసుకెళ్లారు. తీరా అక్కడికి వెళ్లేసరికి వైద్యులు లేకపోవటం... ఆ అభాగ్యురాలి సమస్యను మరింత పెంచింది. నొప్పితో విలవిల్లాడిన బాధితురాలిని చూసి... బంధువులు కన్నీరుమున్నీరయ్యారు. ఇన్ని అవాంతరాల అనంతరం.. చివరికి వైద్యులు చికిత్స అందించారు.