విశాఖలో ముగిసిన ఈ-బైక్​, గోకార్ట్​ల సందడి

రయ్ రయ్ మంటూ దూసుకుపోయే కార్ట్ లు ఓవైపు.. చప్పుడు లేకుండా సర్రున పరుగులు పెట్టే బైక్ లు మరోవైపు. విద్యార్థుల్లో పర్యావరణహిత వాహనాలపై ఆసక్తిని పెంచడం... వాహనాల తయారీ నైపుణ్యంపై మెలకువలకు పదును పెట్టడమే లక్ష్యంగా జరిగిన ఈ-బైక్ ఉత్సవ్ యువతలో నూతనోత్సాహాన్ని తెచ్చింది. అయిదు రోజుల పాటు వేడకగా జరిగిన పోటీలు ఆదివారంతో ముగిశాయి.

విశాఖకు చెందిన 'ఇమాజిన్ టు ఇన్నోవేట్' అనే సంస్థ నిర్వహించిన ఈ-బైక్ సీజన్ -3 వేడుకలు ఇంజినీరింగ్ విద్యార్థుల నైపుణ్యాలకు పదునుపెట్టాయి. వివిధ రాష్ట్రాల నుంచి సుమారు వెయ్యి మంది విద్యార్థులు అనేక బృందాలుగా ఏర్పడి వివిధ ఆవిష్కరణలకు రూపమిచ్చారు. ఈ-బైక్​లు, గోకార్ట్​లు తీర్చిదిద్దారు. రఘు ఇంజినీరింగ్ కళాశాలలో జరిగిన ఈ కార్యక్రమం అయిదు రోజుల పాటు సందడిగా సాగింది. విద్యార్థులు రూపొందించిన వాహనాలకు నిర్వాహకులు ఏర్పాటు చేసిన పోటీలు యువతలో స్ఫూర్తి నింపడమే కాకుండా ఉత్సాహాన్ని రెట్టింపు చేశాయి.
ప్రమాదానికి గురైతే క్షణాల్లో బంధువులకు మెసేజ్​
చిత్తూరు జిల్లా మదనపల్లి ఆదిత్య ఇంజనీరింగ్ కళాశాలకు చెందిన విద్యార్థులు ఈ బైక్, గో కార్టింగ్ పోటీలకు విశాఖపట్నం వచ్చారు. తాము రూపొందించిన వినూత్న ఎలక్ట్రిక్ ద్విచక్రవాహనాన్ని ఈ సందర్భంగా ప్రదర్శించారు.
ఈ-బైక్​ ప్రత్యేకతలు ఏంటి?
డ్రైవింగ్ లైసెన్స్​కు ఉండే చిప్ వినియోగించి మాత్రమే ఈ వాహనాన్ని స్టార్ట్ చేసే అవకాశం ఉంటుందని టీం లీడర్​ మోహన్​ తెలిపారు. దీని వల్ల వాహన చోరీని నివారించవచ్చన్నారు. అదేవిధంగా ప్రత్యేక డిటెక్షన్ సెన్సార్​లను ఇందులో పొందుపరిచారు. దీని వల్ల వాహనం ఎక్కడైనా ఒరిగితే, వెంటనే బంధువులకు, అంబులెన్సు వంటి వ్యవస్థలకు మెసేజ్​పంపి అప్రమత్తం చేసే ఏర్పాట్లు చేశారు. అక్షాంశాలు, రేఖాంశాల ఆధారంగా సంకేతాలు వెళ్లే ఏర్పాట్లు ఉన్నాయి. 2 నెలలపాటు ఈ బృందం కష్టపడి ఈ-బైక్​ను లక్షా 10 వేల రూపాయల వ్యయంతో తయారుచేశారు. రానున్న కాలంలో ఈ వాహనాన్ని వాణిజ్యపరంగా మార్కెట్లోకి విడుదల చేసేందుకు వీరు ప్రణాళికలు సిద్ధం చేస్తున్నారు.
ఆటోమొబైల్ రంగంలో నూతన ఒరవడి సృష్టించడమే లక్ష్యంగా దూసుకుపోతున్న యువ ఇంజినీర్ల ప్రతిభకు ఈ వేదిక పట్టం కట్టింది. రఘు కళాశాల ఎదురుగా ఉన్న ఫార్చూన్ హిల్స్ రహదారులపై ల్యాప్​లు ఏర్పాటు చేశారు. తాము తీర్చిదిద్దిన వాహనాలతో పోటీపడ్డారు. పర్యావరణహితమైన వాహనాలతో కొత్తరూపు, ఆవిష్కరణలు తీసుకువస్తామని విద్యార్థులు చెబుతున్నారు.

ఇదీ చదవండి :