"విశాఖలో బ్యాడ్మింటన్ అకాడమీ... భూమి ఇచ్చేందుకు సీఎం హామీ"

భవిష్యత్తులో క్రీడల్లో మరింతగా రాణించేందుకు సీఎం జగన్​ అండగా ఉంటామన్నారు. క్రీడాకారులను ప్రోత్సహించేందుకు వీలుగా బ్యాడ్మింటన్ అకాడమీ ఏర్పాటుకు విశాఖలో 5 ఎకరాలు కేటాయిస్తామని హామీ ఇచ్చారు: పీవీ సింధు

విశాఖలో బ్యాడ్మింటన్ అకాడమీ ఏర్పాటుకు 5 ఎకరాలను కేటాయించేందుకు ముఖ్యమంత్రి జగన్​ మోహన్​రెడ్డి సంసిద్ధత వ్యక్తం చేశారు. ఈ మేరకు బ్యాడ్మింటన్ క్రీడాకారాణి పీవీ సింధుకు హామీ ఇచ్చారు. తల్లిదండ్రులు, పీవీ రమణ, విజయ, క్రీడా శాఖ మంత్రి ముత్తంశెట్టి శ్రీనివాసరావు, క్రీడా సంఘాల ప్రతినిధి చాముండేశ్వరీనాథ్, శాప్ అధికారులతో కలిసి రాజ్​భవన్​లో గవర్నర్ బిశ్వభూషణ్ హరిచందన్​ను, సచివాలయంలో సీఎం జగన్​ను పీవీ సింధు శుక్రవారం వేర్వేరుగా కలిశారు. వారు ఆమెను ఘనంగా సత్కరించారు. సింధు తెలుగు రాష్ట్రాలకే కాక దేశానికే గర్వకారణమని గవర్నర్ అన్నారు. అనంతరం విలేకరులతో సింధు మాట్లాడారు. గవర్నర్​, సీఎం తనను అభినందించటం సంతోషంగా ఉందని అన్నారు. భవిష్యత్తులో క్రీడల్లో మరింతగా రాణించేందుకు సీఎం జగన్​ అండగా ఉంటామన్నారని సింధు పేర్కొన్నారు. క్రీడాకారులను ప్రోత్సహించేందుకు వీలుగా బ్యాడ్మింటన్ అకాడమీ ఏర్పాటుకు విశాఖలో 5 ఎకరాలు కేటాయిస్తామని హామీ ఇచ్చారని సింధు తెలిపారు. పద్మభూషణ్ పురస్కారానికి తన పేరును కేంద్రం నామినేట్ చేసిన విషయంపై తనకింకా అధికారిక సమాచారం రాలేదని వెల్లడించారు.