teachers union on prc : పీఆర్సీ సాధన సమితి ద్వారా సమస్యలు పరిష్కారం అవుతాయనుకున్నామని ఉపాధాయ ఉద్యోగ సంఘాల నేతలు తెలిపారు. అశోతోష్‌ మిశ్రా కమిటీ నివేదిక ఇస్తామనడంతో చర్చలకు వెళ్లామన్నారు. హెచ్‌ఆర్‌ఏ పాత శ్లాబుల ప్రకారం ఇవ్వాలని.. ప్రధాన డిమాండ్‌ ఫిట్‌మెంట్‌ విషయాన్ని తేల్చాలని కోరామన్నారు. అలాగే అదనపు క్వాంటం పింఛన్‌ తగ్గించవద్దని విజ్ఞప్తి చేశామన్నారు. అదనపు క్వాంటం పింఛన్‌ విషయంలో ప్రభుత్వం తమతో బేరాలు ఆడి 7, 12 శాతంగా తేల్చారన్నారు. ప్రస్తుతం రాష్ట్ర ఆర్థిక పరిస్థితులు బాగోలేదని ప్రభుత్వం తమతో తెలిపిందన్నారు.
ఉద్యోగుల గ్రాట్యూటీ విషయంలోనూ తమకు అన్యాయం జరిగిందని నేతలు ఆరోపించారు. పదవీ విరమణ చేసిన ఉద్యోగులకు రెండేళ్ల తర్వాత గ్రాట్యూటీ వస్తుందన్న నేతలు.. కనీసం ఐఆర్‌ 27 శాతమైనా ఇవ్వాలని కోరామన్నారు. దానిపై స్పందించిన ప్రభుత్వం..ఐఆర్‌ ముగిసిన అంశం మళ్లీ ప్రస్తావించవద్దని చెప్పారన్నారు. ప్రభుత్వ ప్రతిపాదనలను స్టీరింగ్‌ కమిటీ భేటీలో ఎస్‌టీయూ, యూటీఎఫ్‌, ఏపీటీఎఫ్‌ వ్యతిరేకించాయన్నారు. స్టీరింగ్‌ కమిటీలో మెజార్టీ నిర్ణయం ప్రకారం సమ్మె విరమిస్తున్నట్లు పీఆర్సీ నేతలు ప్రకటించారు. స్టీరింగ్‌ కమిటీ తమ మాటలు వినకుండా ఏకపక్షంగా వెళ్లిందన్నారు. అందుకే స్టీరింగ్‌ కమిటీకి తాము రాజీనామా చేస్తున్నమన్నారు.