ప్రశ్న: అమెరికా ఎన్నికల ప్రక్రియ ఇప్పటికే మొదలైంది. అక్కడి ఎన్నికలంటే.. ప్రపంచవ్యాప్తంగా ఆసక్తి ఉంటుంది. ఎన్నికల ప్రక్రియ ఎలా నడుస్తోంది అక్కడ?
జవాబు: చాలా రాష్ట్రాల్లో ఎన్నికల ప్రక్రియ ఇప్పటికే మొదలైంది. ఇప్పటికే ఇక్కడి పౌరులు ఓటుహక్కును వినియోగించుకుంటున్నారు. నవంబర్ 3తో ఓటింగ్ ముగుస్తుంది. అమెరికా ఎన్నికలంటే.. భారత్లోనే మీడియా హడావుడి ఎక్కువుగా ఉంటుంది. భారత్లో ఉన్నంత ఆసక్తి అమెరికాలో ఉండదు. పోలింగ్ శాతం కూడా ఎప్పుడూ 55 శాతం దాటదు. అధ్యక్షుడిగా ఎవరు ఎన్నికవుతారు అన్న విషయాన్ని తప్పితే.. మిగతా ఎన్నికల ప్రక్రియను అంతగా పట్టించుకోరు. స్థానికంగా ఉండేవారికి.. వారి కాంగ్రెస్ సభ్యులు, సెనేటర్లు ఎవరో కూడా తెలీదు. భారత్లో లాగా మొత్తం ఎన్నికల ప్రక్రియపై అంత ఆసక్తి ఉండదు. ప్రస్తుతానికి ఉన్న పరిస్థితుల్లో డెమోక్రాట్లకు మొగ్గు ఎక్కువుగా ఉంది.
ప్రశ్న: కిందటిసారి ఎన్నికలను చూస్తే.. ప్రీ పోలింగ్ సమయంలో డెమోక్రాట్లకు అనుకూలంగా కనిపించింది. భారత్ లాంటి చోట్ల హిల్లరీ క్లింటన్ గెలుస్తారనే అభిప్రాయమే వ్యక్తమైంది. కానీ ఫలితాలు అనూహ్యంగా వచ్చాయి. ట్రంప్ పాలన ఎలా ఉందో ఈ నాలుగేళ్లు జనం చూశారు. ఇప్పుడు పరిస్థితి ఎలా ఉంటుందని మీ అంచనా?
జవాబు: కిందటి ఎన్నికల్లో వివిధ దేశాల ప్రజల ఓట్లు హిల్లరీ క్లింటన్కు వస్తాయి అనుకున్నారు. అలాగే సబర్బన్ మామ్స్ ( నగరాల బయట ఉండి ఉద్యోగాలు చేసుకునే మహిళలు ) ఓట్లు కూడా హిల్లరీకి వస్తాయి అని అంచనా వేశారు. కానీ ఏ కారణం వల్లనో అలా జరగలేదు. ట్రంప్కు కలిసొచ్చిన అంశం ఆయన సంప్రదాయ రాజకీయ నాయకుడు కాదు. ఆయన ఒక వ్యాపారవేత్త. అదే అతనికి కలిసొచ్చింది. ఎన్నికలకు ముందు పరిస్థితి మొత్తం ట్రంప్కు వ్యతిరేకంగా ఉంది. మీడియా కూడా వ్యతిరేకించింది. కచ్చితంగా ఓడిపోతారు అనుకున్నారు. కనీసం 270ఎలక్టోరల్ ఓట్లు వస్తాయో రావో అనుకుంటే.. 300కు పైగా వచ్చాయి. ఇప్పుడు కూడా ఎన్నికలకు ముందు బైడెన్ ముందంజలో ఉన్నారు. కానీ చివరికి ఏం జరుగుతుందో చెప్పలేం. కాబట్టి పోరు ఆసక్తికరంగానే ఉంది.
ప్రశ్న: కిందటిసారి ఎన్నికల్లో కొన్ని రాష్ట్రాల్లో ట్రంప్కు బాగా మెజార్టీ వచ్చింది. అదే ఆయనకు అధ్యక్ష పదవి తెచ్చింది. ఇప్పుడు ఏయే రాష్ట్రాల్లో పరిస్థితులు అనుకూలంగా ఉన్నాయి?
జవాబు:మధ్య పశ్చిమ (మిడిల్ వెస్ట్) రాష్ట్రాలు.. వీటిని రెడ్ స్టేట్స్ అంటారు. ఇక్కడ ఎప్పుడూ రిపబ్లికన్లకు అనుకూలంగానే ఉంటుంది. కోస్తా రాష్ట్రాల్లో మాత్రం డెమోక్రాట్లకు అనుకూలంగా ఉంటుంది. న్యూయార్క్, కాలిఫోర్నియా వంటి కోస్తా ప్రాంతాల్లో ఎక్కువుగా వలసదారులు ఉంటారు. పైగా ఇవన్నీ చాలా పెద్ద రాష్ట్రాలు. కాలిఫోర్నియాలో 55, న్యూయార్క్లో 30కిపైగా ఎలక్టోరియల్ ఓట్లు ఉన్నాయి. అలాగే ఇలనాయిస్ కూడా పెద్దరాష్ట్రం... అక్కడా డెమోక్రాట్లకు మెజార్టీ ఉంటుంది. రెడ్స్టేట్లలో రిపబ్లికన్లకు, కోస్తా ప్రాంతంలో డెమెుక్రాట్లకు మెజార్టీ అన్నది స్పష్టం. ఈ రెండు ప్రాంతాలను రెండు పార్టీలు పంచుకుంటాయి. ఇక్కడ ఫలితాల్లో మార్పు ఉండదు. పోరు తీవ్రంగా ఉండే రాష్ట్రాలే ఫలితాలను నిర్ణయిస్తాయి. ఓహాయో, పెన్సిల్వేనియా, మిషీగన్ లాంటివి రిపబ్లికన్లకు అనుకూలంగా రావడంతో ట్రంప్ గెలవగలిగారు. ఇప్పటివరకూ ఓహాయోలో గెలవకుండా ఏ రిపబ్లికన్ అభ్యర్థి కూడా వైట్హౌస్కు వెళ్లలేదు. ఇవి కాకుండా కొలరాడో, నెవడా, నార్త్ కరోలినా కూడా ముఖ్యమైనవి. అందుకే ట్రంప్ తన పదవీకాలంలో దాదాపు పదిసార్లు ఈ ప్రాంతంలో పర్యటనలు చేశారు. అయితే ఇక్కడ ఇంకో విషయం చెప్పుకోవాలి. 47ఏళ్లు రాజకీయ అనుభవం ఉన్న బైడెన్ పుట్టింది పెన్సిల్వేనియాలో. ఆయన డలోవేర్ కు సెనేటర్గా ఉన్నా కూడా పెన్సిల్వేనియాలోనే నివసిస్తారు. రిపబ్లికన్ల తరఫున ఒహాయోకు రెండుసార్లు గవర్నర్గా పనిచేసిన జాన్కాసిక్ ఇప్పుడు డెమోక్రాట్లకు మద్దతిస్తున్నారు. ఇంతకుముందు రిపబ్లికన్ అధ్యక్ష పదవికి పోటీపడిన జాన్ మికెన్ భార్య కూడా ఇప్పుడు డెమోక్రాట్లకు మద్దతిస్తున్నారు. ఫలితాలను నిర్దేశించే.. ఈ రాష్ట్రాల్లో బైడెన్ 5-6శాతం ముందంజలో ఉన్నారు. ఇక్కడే మన భారతీయులు, ఇతర వలసదారులు కూడా ఎక్కువుగా ఉన్నారు. ఓట్లు ఎలా ఉంటాయో చూడాలి.
ప్రశ్న: ట్రంప్ నాలుగేళ్ల పాలన ఎలా ఉంది. ట్రంప్ గెలిస్తే.. ఏ అంశాల వల్ల గెలుస్తారు? ఓడిపోతే.. ఎందుకు ఓడిపోతారు అనుకుంటున్నారు?
జవాబు: ట్రంప్ హయాంలో ఆర్థిక వ్యవస్థ బాగుంది. కొవిడ్ పరిస్థితుల్లో కూడా అమెరికన్ ఆర్థిక వ్యవస్థ బాగా కోలుకుంది. నిరుద్యోగం అదుపులో ఉంది. స్టాక్ మార్కెట్లు పుంజుకున్నాయి. ఇవన్నీ ఆయనకు సానుకూలాంశాలు. అంతర్గత భద్రత విషయంలో ట్రంప్ పాలన బాగుందనే అభిప్రాయం ఉంది. బ్లాక్ లైఫ్ మాటర్స్ వంటి ఆందోళనలు జరిగినప్పటికీ.. భద్రత విషయంలో ఆందోళనలు లేవు. విదేశాంగ విధానంలోనూ ట్రంప్కు సానుకూలత ఉంది. చైనాను డీల్ చేసిన విధానం, పారిస్ ఒప్పందం నుంచి బయటకు రావడం, ప్రపంచ ఆరోగ్య సంస్థకు నిధులిచ్చే విషయం, ఇరాన్ అణువిధానంపై వ్యవహరించిన విధానం వీటన్నింటిలో రాజకీయాలకు అతీతంగా.. అమెరికాకు ఏది మంచిది అనే విషయాన్నే ఆలోచించారు అనే అభిప్రాయం అమెరికన్లలో ఉంది. అలాగే ఈయన వ్యాపారులకు చాలా అనుకూలం. ఉద్యోగాల కల్పన విషయంలో ముందుంటారు అనే పేరుంది. క్రిమినల్ జస్టిస్ సంస్కరణలు వంటివి కూడా సానుకూలంగా ఉన్నాయి. ఒకప్పుడు నల్లవారి దగ్గర డ్రగ్స్ ఉంటే వెంటనే జైలులో పెట్టేవారు. అది మార్చారు. అలాగే నల్లవారి కోసం యునైటెడ్ నిగ్రో కాలేజ్ ఫండింగ్ అని చాలా పెద్ద కార్యక్రమం తీసుకొచ్చారు. వారికి ఉద్యోగాల కల్పన విషయంలో కూడా ప్రత్యేక శ్రద్ధ తీసుకున్నారు. పోయినసారి ఎన్నికల్లో కేవలం 8శాతం మంది మాత్రమే ట్రంప్కు మద్దతివ్వగా.. ఈసారి 23 శాతం ఆయనకు అనుకూలంగా ఉంటారని అంచనా. చివరకు ఎవరికైనా కావలసింది ఉపాధే... ఆ విషయంలో నల్లవారి కోసం ట్రంప్ చాలా సంస్కరణలు తీసుకొచ్చారు. కాబట్టి బ్లాక్స్ లైఫ్ మాటర్ వంటి ఆందోళనలు జరిగినా.. వారి మద్దతు కూడా ఆయనకు ఉంటుంది అనుకుంటున్నారు. ఇక ఓడిపోతే.. ఎందుకు ఓడతారు అంటే.. నా ఉద్దేశంలో మాస్క్ పెట్టుకోకపోవడం. అది ఆయన స్వయంకృతాపరాధం. మాస్కు పెట్టుకోలేదు. ఆయనకు కూడా కరోనా వచ్చింది. కొవిడ్ ను మొదట్లో చాలా తేలికగా తీసుకున్నారు అనే భావన ఉంది. మీడియా పూర్తిగా వ్యతిరేకంగా ఉంది. ఈ నాలుగేళ్లలో మీడియా ఆయన్ను పూర్తిగా వ్యతిరేకించింది. అలాగే బ్లాక్స్ లైఫ్ మాటర్ అనేది కొంత వ్యతిరేకత తీసుకురావచ్చు. అనూహ్యంగా ఉండే ఆయన వ్యవహారశైలి, పద్ధతి, గౌరవం లేకుండా వ్యవహరించే విధానం కొంతమందికి నచ్చకపోవచ్చు. అధ్యక్షుడిగా ఆయన అంగీకార యోగ్యత కూడా పడిపోయింది. ఆయనకు 43శాతం మందే అనుకూలంగా ఉండగా.. 56శాతం మంది వ్యతిరేకించారు.
ప్రశ్న: అమెరికా ఎన్నికల ప్రక్రియలో ప్రెసిడెన్షియల్ డిబేట్ అన్నది చాలా ముఖ్యమైనది. ఇద్దరు అభ్యర్థుల మధ్య జరిగిన రెండు డిబేట్లపై అమెరికన్ల అభిప్రాయం ఎలా ఉంది?
జవాబు: మొదటి చర్చను చూసి చాలా మంది సిగ్గుపడ్డారు. వీళ్లా అమెరికన్ ప్రెసిడెంట్లు అయ్యేది అని బాధపడ్డారు. ఇద్దరూ కూడా పరస్పరం గౌరవం లేకుండా మాట్లాడుకోవడంపై వ్యతిరేకత వచ్చింది. రెండో డిబేట్ బాగా జరిగింది. ఎన్నికల కమిషన్ నిబంధనలు కచ్చితంగా పాటించాలి అని ఆదేశించడంతో రెండోసారి సరిగ్గా జరిగింది. ఇద్దరూ కూడా తమ విధానాలను బాగా వివరించగలిగారు.
ప్రశ్న: రెండో డిబేట్ లో ట్రంప్ ...' వ్యాపారవర్గాలకు అనుకూలమనే' తన ట్రంప్ కార్డును బాగా వాడినట్లు కనిపించింది. ఇంధన సంస్థలపై పర్యావరణ ఆంక్షలు తీసుకొస్తామని బైడెన్ చెప్పినప్పుడు.. ట్రంప్ స్థానికతను రెచ్చగొట్టినట్లుగా కనిపించింది. వ్యాపారవర్గాలకు బైడెన్ వ్యతిరేకం అనే భావన కలిగించారు కదా.. ?
జవాబు: ట్రంప్ మాట్లాడే విధానమే అలా ఉంటుంది. ఎదుటివారిపై దాడి చేస్తున్నట్లుగానే ఉంటుంది. పర్యావరణ విధానంపై బైడెన్ మాట్లాడుతున్నప్పుడు... దానిలోనుంచి అవకాశం తీసుకునే ప్రయత్నం చేశారు. అయితే నా ఉద్దేశంలో ఇద్దరు అభ్యర్థులు కూడా రెండో డిబేట్లో సమర్థంగా తమ వాదన వినిపించారు. వ్యాపారం, పన్నుల విషయంలో ట్రంప్ తన వాదన సమర్థంగా వినిపించారు. చారిత్రకంగా, సాంప్రదాయకంగా రిపబ్లికన్లు ఎప్పుడూ వ్యాపారవర్గాలకు అనుకూలంగా ఉంటారు. డెమోక్రాట్లు.. వలసదారులకు అనుకూలంగా ఉంటారు. చట్టబద్ధమైన వలసదారులను రిపబ్లికన్లు అనుమతిస్తారు. డెమోక్రాట్లు.. మాత్రం.. చట్టవ్యతిరేకంగా నివసిస్తున్న వలసదారులు, డ్రీమర్లకు ( చిన్నతనంలోనే యు.ఎస్ వచ్చిన వారు) కూడా అనుకూలంగానే ఉంటారు. ఓ రకంగా వారిని ఓటుబ్యాంకుగా మలుచుకుంటారు. అది వారి అనుకూలాంశం.
ప్రశ్న: అమెరికా ఎంత స్వేచ్ఛాయుత దేశమో.. అంతగా భయపడుతుంది అనే అభిప్రాయం ఉంది. స్థానికంగా ఉండే అమెరికన్లు తమ హక్కులు , అవకాశాలు కోల్పోతున్నామనే ఉద్దేశంతో ఉంటారు.. దానినే ట్రంప్ అవకాశంగా మలుచుకుంటున్నారనే భావన ఉంది?