లింగంపల్లి రైల్వేస్టేషన్​లో శిశువులకు పాలిచ్చేందుకు ప్రత్యేక గది

దక్షిణ మధ్య రైల్వే పరిధిలోని లింగంపల్లి రైల్వే స్టేషన్​లో శిశువులకు పాలిచ్చేందుకు ప్రత్యేక గది ఏర్పాటైంది. దీనిని సికింద్రాబాద్ డివిజన్ డివిజనల్ రైల్వే మేనేజర్ అభయ్ కుమార్ గుప్తా ప్రారంభించారు. రోటరీ క్లబ్ సహకారంతో ఈ గదిని ఏర్పాటు చేశారు. త్వరలో హైదరాబాద్, సికింద్రాబాద్, విజయవాడ డివిజన్లలోని ప్రధాన రైల్వే స్టేషన్​లలో ఈ గదులను ఏర్పాటు చేస్తామని అభయ్ కుమార్ గుప్తా అన్నారు.

చిన్నారుల తల్లులకు సౌకర్యవంతంగా ఉండేలా దక్షిణ మధ్య రైల్వే పరిధిలోని లింగంపల్లి రైల్వే స్టేషన్​లో... శిశువులకు పాలిచ్చే ప్రత్యేక గదిని సికింద్రాబాద్‌ డివిజన్‌ డివిజనల్‌ రైల్వే మేనేజర్‌ అభయ్‌ కుమార్‌ గుప్తా ప్రారంభించారు. ఈ కార్యక్రమంలో హైదరాబాద్‌ రోటరీ డిస్ట్రిక్ట్‌ గవర్నర్‌ ఎన్‌.వి.హనుమంత్‌ రెడ్డి, అంతర్జాతీయ బ్యాడ్మింటన్‌ క్రీడాకారిణి & అర్డున్‌ అవార్డు గ్రహీత సిక్కిరెడ్డి పాల్గొన్నారు.

ప్రత్యేక అభినందనలు...

రైలు ప్రయాణికులకు వసతులు కల్పించడంలో రైల్వే ఎప్పుడూ ముందంజలో ఉంటుందని రైల్వే మేనేజర్ అభయ్ కుమార్ గుప్తా అన్నారు. అందులో భాగంగా ఈ గదిని ఏర్పాటు చేసినట్లు తెలిపారు. రైలు ప్రయాణం కోసం వేచి ఉండే తల్లులు.. వారి శిశువులకు పాలిచ్చేందుకు సురక్షితమైన, సౌకర్యవంతమైన, గౌరవప్రదమైన వసతి ఉండాలన్న ఆలోచనతో వీటిని ఏర్పాటు చేసినట్లు పేర్కొన్నారు. ఈ కేంద్రాల ఏర్పాటుకు సహాయం చేసిన రోటరీ క్లబ్​ను రైల్వే మేనేజర్ ప్రత్యేకంగా అభినందించారు.

మరిన్ని స్టేషన్​లలో ఏర్పాటుకు సన్నాహాలు...

పసిపిల్లల తల్లులకు, శిశువులకు ప్రత్యేక సౌకర్యాలు కల్పించేందుకు రోటరీ క్లబ్‌ సహకారంతో హైదరాబాద్‌, సికింద్రాబాద్‌, విజయవాడ డివిజన్లలోని ప్రధాన రైల్వే స్టేషన్లలో ఇటువంటి ప్రత్యేక గదులు ఏర్పాటు చేసేందుకు ప్రయత్నిస్తున్నట్లు డివిజనల్ మేనేజర్ అభయ్ కుమార్ గుప్తా అన్నారు. 2019-2021 మధ్య కాలంలో బేగంపేట్‌, హైదరాబాద్‌ మరియు సికింద్రాబాద్‌ రైల్వే స్టేషన్లలో శిశువులకు పాలిచ్చేందుకు ప్రత్యేక కేంద్రాలు ఏర్పాటయ్యాయి.

ఇదీచదవండి.