లైవ్​ వీడియో: నదిలో దూకి వృద్ధుడి ఆత్మహత్య

రాష్ట్రంలో వేర్వేరు ఘటనల్లో ముగ్గురు మృతి చెందారు. విజయవాడకు చెందిన ఓ వృద్ధుడు అనారోగ్యంతో...కృష్ణా నదిలో దూకి ఆత్మహత్య చేసుకున్నాడు. మరో ఘటనలో నెల్లూరు జిల్లా సూరాయపాళెంకు చెందిన తొమ్మిదో తరగతి విద్యార్థి ఈతకు వెళ్లి మృతి చెందగా...అనంతపురం జిల్లా కొట్టాలపల్లికి చెందిన వ్యక్తి వాగు దాటుతూ మృతి చెందాడు.

కృష్ణా నదిలో దూకి ఓ వృద్ధుడు మృతి చెందిన ఘటన కృష్ణాజిల్లా తాడిగడపలో జరిగింది. గ్రామానికి చెందిన మన్నే దుర్గా ప్రసాద్...కృష్ణా నదిలో పూజ చేసుకుంటానని చెప్పి తన తమ్ముడు కుమారుడు సుజిత్ వాహనంపై నది వద్దకు చేరుకున్నాడు. నదికి పూజ చేసే దృశ్యాలను సెల్​ఫోన్​లో చిత్రీకరించాలని సుజిత్​కు సూచించాడు. సుజిత్ సెల్​ఫోన్​లో చిత్రీకరిస్తుండగా...నదిలో హఠాత్తుగా దూకేశాడు. అనారోగ్యం వల్లే ఆత్మహత్య చేసుకుంటున్నట్లు వృద్ధుడు సూసైడ్ నోట్​లో పేర్కొన్నాడు. ఘటనపై కేసు నమోదు చేసుకున్న పోలీసుల విచారణ చేపట్టారు.

భార్యను నదిలో తోసి...తానూ దూకేశాడు

హైదరాబాదులోని ఇంటెలిజెన్స్ డిపార్ట్​మెంట్​లో హోంగార్డుగా విధులు నిర్వహిస్తున్న భాస్కర్ అనే వ్యక్తి తన భార్యను నదిలో తోసి తాను కూడా దూకేశాడు. ఈ ఘటన కర్నూలు జిల్లా కోవెలకుంట్ల సమీపంలో జరిగింది. నదిలో దూకిన వెంటనే భాస్కర్ ఒడ్డుకు చేరుకోగా...అర కిలోమీటర్ కొట్టుకుపోయిన అతని భార్య రామలక్ష్మిని స్థానికులు కాపాడారు. తన భర్త భాస్కర్ తనను చంపాలనుకున్నాడని ఆరోపిస్తూ...రామలక్ష్మి పోలీసులకు ఫిర్యాదు చేసింది.

సరదగా ఈతకు వెళ్లి

సరదగా ఈతకు వెళ్లి ఓ విద్యార్థి మృతి చెందిన ఘటన నెల్లూరు జిల్లా పొదలకూరు మండలం సూరాయపాళెంలో జరిగింది. గ్రామానికి చెందిన ఎన్​. వినోద్ కుమార్ అనే తొమ్మిదో తరగతి విద్యార్థి ఈత కొట్టేందుకు చెరువులోకి దిగి మృతి చెందాడు.

వాగులో కొట్టుకుపోయి వ్యక్తి మృతి

అనంతపురం జిల్లా పెద్దవంకలో విషాదం చోటు చేసుకుంది. కొట్టాలపల్లికి చెందిన బాలకృష్ణారెడ్డి అనే వ్యక్తి వాగులో కొట్టుకుపోయి మృతి చెందాడు. వాగు దాటే క్రమంలో ప్రమాదం జరిగిందని స్థానికులు తెలిపారు.

కృష్ణా నదిలో పడి వ్యక్తి గల్లంతు

కృష్ణా జిల్లా నాగాయలంకు చెందిన వ్యక్తి కనిపించకుండా పోవటంతో పోలీసులు మిస్సింగ్ కేసు నమోదు చేశారు. అతడు పులిగడ్డ వరకు వచ్చినట్లు సీసీ కెమెరాల ద్వారా తెలిసింది. అతడు నదిలో దూకి ఉండవచ్చన్న అనుమానంతో పోలీసులు, ఎస్డీఆర్​ఎఫ్ బృందాల ద్వారా నదిలో గాలించారు. అయినా ఫలితం దక్కలేదు.

ఇదీచదవండి