విజయవాడలో కొవిడ్ నిర్ధరణ పరీక్షా కేంద్రాలు ఎక్కడో తెలీక చాలా మంది ప్రైవేట్ ఆసుపత్రులకు పరుగులు పెడుతున్నారు. గతంలో ఇందిరాగాంధీ స్టేడియం, రైల్వే స్టేడియం, బిషప్ అజరయ్య స్కూల్‌లో పరీక్షలు నిర్వహిస్తుండేవారు. ప్రస్తుతం ఎక్కడో తెలియటం లేదని బాధితులు ఆవేదన వ్యక్తం చేస్తున్నారు. ప్రస్తుతం డెంగీ, మలేరియా, టైఫాయిడ్‌ జ్వరాలు పెరుగుతున్నాయి. జ్వరం వచ్చిందంటే చాలు.. ముందుగా కొవిడ్ పరీక్ష చేయించుకోమని వైద్యులు సూచిస్తున్నారు. ఆ తర్వాతే ఆసుపత్రులకు రావాలంటున్నారు.
కృష్ణా జిల్లాలో కొవిడ్ కేసులు నిత్యం 200 నుంచి 300 వరకు నమోదవుతున్నాయి. రోజూ కనీసం ఇద్దరి నుంచి ఐదుగురి వరకు వైరస్‌ బారినపడి చనిపోతున్నారు. కానీ.. కరోనా నిర్ధరణ పరీక్ష కేంద్రాలను మాత్రం ఎక్కడా కొనసాగించడం లేదు.
విజయవాడ చుట్టుపక్కల ప్రాంతాలతో పాటు గుడివాడ, నూజివీడు, మచిలీపట్నం డివిజన్ల పరిధిలో కరోనా పాజిటివ్‌ కేసులు అధికంగా వస్తున్నాయి. గ్రామీణ ప్రాంతాల్లో కొన్నిచోట్ల మాత్రమే కొవిడ్ పరీక్షలు నిర్వహిస్తున్నారు. వాటికి సంబంధించిన శాంపిళ్లను పరీక్షల కోసం విజయవాడ సహా జిల్లాలో ఏర్పాటు చేసిన ల్యాబ్‌లకు పంపుతున్నారు. కొవిడ్ నిర్ధరణ పరీక్షల కోసం ల్యాబ్‌లో పనిచేసే వైద్య సిబ్బందిని పెద్ద సంఖ్యలో నియమించారు. ప్రస్తుతం వీరందరూ అందుబాటులో ఉన్నా.. పరీక్షల కేంద్రాలను మాత్రం కొనసాగించకపోవడంతో... వీరికి కూడా పెద్దగా పనిలేకుండా పోయింది. కొవిడ్ పరీక్షా కేంద్రాలు అందుబాటులో ఉంచాలని ప్రజలు ప్రభుత్వాన్ని కోరుతున్నారు.