సాధారణంగా కళ్ల కలకలు వైరస్ వల్లే వస్తాయి. మన దగ్గర చాలామంది వీటి బారిన పడుతుంటారు. కొద్ది రోజులపాటు ఉండి తగ్గిపోతుంటాయి. అయితే ప్రస్తుత పరిస్థితి వేరని వైద్యులు హెచ్చరిస్తున్నారు. చైనాలోని వుహాన్‌ నగరంలో తొలుత కళ్ల కలకతో వచ్చిన వ్యక్తిలో కరోనా వైరస్ ఉన్నట్లు ఓ వైద్యుడు గుర్తించారు. ఈ విషయాన్ని అక్కడి ప్రభుత్వం తొలుత కొట్టిపారేసింది. తర్వాత పరిస్థితి తీవ్రమైంది. ముఖ్యంగా కరోనా బాధితుల్లో కొందరిలో ఎలాంటి లక్షణాలు పైకి కన్పించకపోవచ్చునని వైద్యులు పేర్కొంటున్నారు.
నిర్లక్ష్యం చేయకుండా..
ప్రస్తుత పరిస్థితిలో జ్వరం, కళ్ల కలకలతో బాధపడుతుంటే నిర్లక్ష్యం చేయకుండా వైద్యులను సంప్రదించడం మేలని పలువురు సూచిస్తున్నారు. సరోజినిదేవి ఆసుపత్రిలో కరోనా బాధితుల కోసం క్వారంటైన్‌ కేంద్రం కొనసాగిస్తున్నారు. ఇక్కడ 145 మంది ఉన్నారు. నిత్యం ఆసుపత్రికి వచ్చే వారిలో జలుబు, దగ్గు, జ్వరం, ఆయాసం లక్షణాలు కన్పిస్తే క్వారంటైన్‌ చేస్తున్నారు.