COVID TESTS: పెరుగుతున్న కరోనా కేసులు...తగ్గుతున్న నిర్ధారణ పరీక్షలు

COVID TESTS: రాష్ట్రంలో కొవిడ్‌ కేసులకు తగ్గట్లు నమూనాల పరీక్షలు పెరగడం లేదు. భారీగా కేసులు వస్తున్నా... విశాఖ, చిత్తూరు జిల్లాల్లోనూ పరీక్షలు పరిమితంగానే జరుగుతున్నాయి. ఈ నెల 13 నుంచి రోజుకు 35వేల వరకు మాత్రమే పరీక్షలు నిర్వహిస్తున్నారు. రోజుకు లక్ష నుంచి లక్షా 20వేల వరకు పరీక్షలు చేసే సామర్థ్యం వైద్య ఆరోగ్య శాఖకు ఉన్నా.... ఆ స్థాయిలో జరగడం లేదు. అనుమానిత లక్షణాలు ఉన్న వారు ప్రైవేట్‌ ల్యాబ్‌లను ఆశ్రయించి ఆర్థికంగా నష్టపోతున్నారు.

COVID TESTS: రాష్ట్రంలో కొవిడ్ నిర్ధరణ పరీక్షలు పరిమితంగానే జరుగుతున్నాయి. గతంలో కొత్త కేసు రాగానే... ప్రైమరీ, సెకండరీ కాంటాక్ట్స్‌ను గుర్తించి పరీక్షలు చేసేవారు. ఇప్పుడు ఆ ఛాయలే కనిపించని పరిస్థితి. పరీక్షలు పెరిగితే బయటపడే కేసులకు తగ్గట్లు వైరస్‌ వ్యాప్తి నియంత్రణకు అవకాశం ఉంటుంది. కానీ జిల్లాల్లో అందుకు తగిన కార్యాచరణ ఉండడం లేదు. ఉన్నతాధికారుల పర్యవేక్షణనైతే అసలు కనిపించడం లేదు. ల్యాబ్స్, పరికరాలను సద్వినియోగం చేసుకోవడం లేదన్న విమర్శలు వినిపిస్తున్నాయి. పరీక్షలు ఎక్కడ చేస్తున్నారన్న వివరాల కోసం విశాఖ లాంటి చోట్ల కొవిడ్‌ కాల్‌సెంటర్‌కు ఫోన్లు వస్తున్నాయంటే పరిస్థితి అర్థం చేసుకోవచ్చు.

ప్రస్తుతం రాష్ట్రంలో 6 సీబీనాట్, 5 క్లియా, నాకో, 200 వరకు ట్రూనాట్, 19 వీఆర్​డీఎల్ మిషన్లు ఉన్నాయి. చాలా చోట్ల ట్రూనాట్‌ మిషన్లను కొవిడ్‌ నిర్థరణకు వాడటం లేదని తెలుస్తోంది. కేసులు అధికంగా ఉన్న చిత్తూరు, విశాఖ జిల్లాల్లోనూ నిర్థరణ పరీక్షలు 5 వేలు దాటడంలేదు. చిత్తూరు జిల్లా కన్నా విశాఖలోనే తక్కువగా పరీక్షలు జరుగుతున్నాయి. రెవెన్యూ డివిజన్‌ కేంద్రాల్లో సేకరించిన నమూనాలను ఆర్టీపీసీఆర్ ల్యాబ్స్‌కు తరలించేందుకు వాహనాలు ఒకటి, రెండురోజులకోకసారి వస్తున్నాయి. ఈ లోగా ర్యాపిడ్‌ యాంటీజెన్స్‌ ద్వారా నిర్థరణ పరీక్షలు చేస్తున్నారు.

కరోనా నిర్థరణ చేసుకునేందుకు సౌకర్యాలు పరిమితంగా ఉండడం, ప్రభుత్వ పరంగా ఎక్కడ సేకరిస్తున్నారో తెలియక చాలా మంది ప్రైవేట్‌ ల్యాబ్స్‌పై ఆధారపడుతున్నారు. ప్రభుత్వం నిర్దేశించిన ప్రకారం ఒక్కో ఆర్టీపీసీఆర్ పరీక్షకు 475 రూపాయలు మాత్రమే ల్యాబ్స్‌ వారు తీసుకోవాలి. కానీ వెయ్యి వరకు వసూలు చేస్తున్నారు. ‘ఒమిక్రాన్‌’ వేరియంట్‌ అవునా? కాదా? అని చెప్పేందుకు అదనంగా 800 చెల్లించాలని విజయవాడలో ఓ ప్రైవేట్‌ ల్యాబ్‌ వారు ప్రచారం చేస్తున్నారు. ప్రైవేట్‌ ల్యాబ్స్‌ దోపిడీ నియంత్రించేలా అధికారుల చర్యలు ఉండటం లేదు. రాష్ట్రంలో ఆర్టీపీసీఆర్ ద్వారా పరీక్షలు చేస్తున్న ప్రైవేట్‌ సంస్థలు 40 వరకు ఉన్నాయి. ఈ సంస్థలు ప్రతి కొవిడ్‌ కేసును అధికారికంగా నమోదు చేయాలి. కానీ ఇవేమీ ఆచరణలో జరగడం లేదు. దీనివల్ల అనధికారిక కొవిడ్‌ కేసులు అధికంగానే ఉంటున్నాయి.

వ్యాక్సినేషన్‌పై దృష్టిపెట్టిన వైద్య ఆరోగ్య శాఖ సిబ్బంది నమూనాల సేకరణకు ప్రాధాన్యం ఇవ్వడంలేదు. ఈ సారి పట్టణాలు, నగరాలు, గ్రామాలు అన్న తేడా లేకుండా వైరస్‌ వ్యాప్తి శరవేగంగా కొనసాగుతోంది. వైరస్‌ సోకిన వారిలో లక్షణాలు తక్కువగా ఉన్నాయన్న ఉద్దేశంతో కొవిడ్‌ నిర్థరణ పరీక్షల నిర్వహణ ప్రాధాన్యాన్ని జిల్లాల అధికారులు విస్మరిస్తుండడంపై విమర్శలు చెలరేగుతున్నాయి.

ఇదీ చదవండి: