రంజాన్‌ ప్రార్థనలు ఇళ్లలోనే చేసుకోండి:సీఎం

పవిత్ర రంజాన్‌ మాసంలో ముస్లింలు ఇళ్లలోనే ప్రార్థనలు చేసుకోవాలని ముఖ్యమంత్రి జగన్‌ విజ్ఞప్తి చేశారు. ఈ మేరకు ముస్లింలకు తెలపాలంటూ మతపెద్దలను కోరారు.

జిల్లా కలెక్టర్లు, ముస్లిం మతపెద్దలతో సీఎం జగన్‌ సోమవారం వీడియో కాన్ఫరెన్స్‌ నిర్వహించారు. 'రంజాన్‌ మాసాన్ని ముస్లింలు అత్యంత పవిత్రమైనదిగా భావిస్తారు. దాన ధర్మాలు చేస్తారు. కానీ ప్రపంచంలో, దేశంలో ఏ జరుగుతుందో అందరికీ తెలుసు. కరోనా వైరస్‌ను అధిగమించేందుకు కొన్ని రోజులుగా అన్ని రకాల చర్యలు తీసుకుంటున్నాం. ఉగాది, శ్రీరామ నవమి, గుడ్‌ఫ్రైడే, ఈస్టర్‌ పండుగలు ఈ సమయంలోనే వచ్చాయి. రంజాన్‌ కూడా ఇప్పుడే వచ్చింది. ఇళ్లలోనే ఉంటూ ప్రార్థనలు చేసుకోవాల్సిన తప్పనిసరి పరిస్థితులు నెలకొన్నాయి. మీరంతా సహకరించి ఇళ్లలోనే ప్రార్థనలు చేసుకోవాలని కోరుతున్నా. ఇది మనసుకు కష్టమైన మాట అయినా సరే చెప్పక తప్పని పరిస్థితి' అని సీఎం అన్నారు. రంజాన్‌ మాసంలో ఇళ్లలోనే ప్రార్థనలు చేసుకునేలా చూస్తామని ముస్లిం మతపెద్దలు ముఖ్యమంత్రికి తెలిపారు.

ప్రతి నెలా తోఫా ఉండాలి...

తోఫా అన్నది పండుగ వచ్చినప్పుడు మాత్రమే గుర్తుకు తెచ్చుకుని శనక్కాయలు, బెల్లాలు మాదిరిగా ఏదో ఇవ్వడం కాదని సీఎం అన్నారు. 'ప్రతి నెలా తోఫా ఉండాలి. అందుకే ప్రతి పేద కుటుంబానికి ప్రతి నెలా ఓ కొత్త కార్యక్రమంతో మేలు చేస్తున్నాం. కరోనా వల్ల రూపాయి ఆదాయం రావడం లేదు. ఖజానాకు రోజూ రూ.150 కోట్ల మేర రావాల్సిన ఆదాయం కోల్పోయినప్పటికీ ప్రజలు ఇబ్బంది పడకుండా అడుగులు వేస్తున్నాం. వచ్చే విద్యాసంవత్సరం నుంచి త్రైమాసికం పూర్తి కాగానే బోధనా రుసుములను విద్యార్థుల తల్లుల బ్యాంకు ఖాతాకే నేరుగా జమ చేస్తాం. ఆ డబ్బును తల్లి నేరుగా కళాశాలకు కడుతుంది' అని సీఎం జగన్ తెలిపారు.

ఆలయాలు, మసీదులు, చర్చిలకు అయిదేసి వేలు

రాష్ట్రంలోని పొదుపు సంఘాల్లోని మహిళలకు ‘సున్నా వడ్డీ’ పథకం కింద రూ.1,400 కోట్లు ఇవ్వనున్నట్లు ముఖ్యమంత్రి ప్రకటించారు. ఈ నెల 24న వారి సంఘం ఖాతాల్లో జమ చేస్తామని తెలిపారు. రాష్ట్రంలోని మసీదులు, చర్చిలు, ఆలయాలకు వాలంటీర్ల ద్వారా రూ.5 వేల చొప్పున అందిస్తామని ప్రకటించారు. బకాయిలు విడుదల కాని మసీదులకు రంజాన్‌ నాటికి పూర్తిగా విడుదల చేస్తామని చెప్పారు.

తప్పుడు ప్రచారంపై చర్యలు

'కర్నూలులో కరోనా నివారణకు మీరు తీసుకుంటున్న చర్యలు బాగున్నాయి. అయితే కొన్ని పత్రికలు, ఛానళ్లు ఉద్దేశ పూర్వకంగా దుష్ప్రచారం చేస్తున్నాయి. ప్రజల్లో అపోహలు, భయాందోళనలు సృష్టిస్తున్నాయి. కర్నూలు ఎమ్మెల్యే మీద అసత్యాలు ప్రచారం చేస్తున్నారు. దీనిపై చర్యలు తీసుకోవాలి' అని ముస్లిం పెద్దలు ముఖ్యమంత్రిని అభ్యర్థించారు. తప్పుడు ప్రచారాలపై నివేదిక పంపాలని కలెక్టర్‌, ఎస్పీలను; నకిలీ వార్తలు, తప్పుడు ప్రచారంపై చర్యలు తీసుకోవాలని డీజీపీ గౌతమ్‌ సవాంగ్‌ను సీఎం ఆదేశించారు.

ఇదీ చదవండి: ఒక్క రోజే 75 కేసులు.. పాజిటివ్ కేసుల్లో దేశంలో 9వ స్థానం