పేదవాడికి ఉపయోగపడని ప్రభుత్వాలు.. ఫెయిల్ అయినట్లే: సీఎం

చిరు వ్యాపారులకు రాష్ట్ర ప్రభుత్వం అండగా ఉంటుందని సీఎం జగన్ ఉద్ఘాటించారు. అధిక వడ్డీలు చెల్లిస్తూ కష్టాలు పడే వారికి 10 వేల రూపాయల రుణం అందిస్తున్నామని.. దీన్ని చిరువ్యాపారులంతా సద్వినియోగం చేసుకోవాలని సూచించారు. రుణాలు ఇవ్వడం నిరంతర ప్రక్రియగా కొనసాగుతుందన్న సీఎం.. సకాలంలో రుణాలు చెల్లించిన వారికి వడ్డీని ప్రభుత్వం తిరిగి చెల్లిస్తుందని హామీఇచ్చారు. వ్యవస్థలు పేదవారికి ఉపయోగపడాలన్నదే తన లక్ష్యమన్న ముఖ్యమంత్రి.. అలా చేయకపోతే ప్రభుత్వం విఫలమైనట్లేనని వ్యాఖ్యానించారు.

'జగనన్న తోడు' పథకం కింద చిరు వ్యాపారులకు వడ్డీలేని రుణం నిధులను ముఖ్యమంత్రి జగన్​మోహన్ రెడ్డి విడుదల చేశారు. వరుసగా రెండో ఏడాదికి సంబంధించి 3లక్షల 70 వేల 458 మంది చిరువ్యాపారులకు 370 కోట్లు నిధులను విడుదల చేశారు. తాడేపల్లి క్యాంపు కార్యాలయం నుంచి కంప్యూటర్ బటన్ నొక్కి నిధులు విడుదల చేశారు. లబ్ధిదారులు కలెక్టర్లు, నేతలతో వీడియో కాన్ఫరెన్స్ ద్వారా మాట్లాడారు. రాష్ట్రంలో సుమారు 9కోట్ల చిరు వ్యాపారులు ఉండగా.. వారికి బ్యాంకులు రుణాలు ఇవ్వడం లేదని సీఎం వ్యాఖ్యానించారు.

గత్యంతరం లేక వడ్డీ వ్యాపారుల వద్ద నుంచి అధిక వడ్డీలకు తీసుకుని తీర్చలేని పరిస్ధితి నెలకొందని సీఎం జగన్ ఆవేదన వ్యక్తం చేశారు. నూటికి పది రూపాయల చొప్పున వడ్డీ చెల్లించాల్సి వస్తోందని, అధిక వడ్డీలు తీర్చలేక చిరు వ్యాపారలు అష్టకష్టాలు పడుతున్నారని వివరించారు. పాదయాత్రలో వారి కష్టాలను చూసి 'జగన్న తోడు' పథకాన్ని ప్రవేశపెట్టినట్టు తెలిపారు. రెండేళ్లలో 9 లక్షల 5 వేలమంది నిరుపేదలైన చిరు వ్యాపారులకు ప్రభుత్వం నుంచి వడ్డీ లేని రుణాలు అందిస్తున్నామని వెల్లడించారు. వ్యవస్థలను పేదవాడికి ఉపయోగపడేలా తీసుకురావాలన్న సీఎం... అలా చేయలేక పోతే ప్రభుత్వాలు ఫెయిల్ అయినట్లే భావించాల్సి ఉంటుందన్నారు.

బ్యాంకులు, ఆప్కాబ్, స్త్రీనిధిని రంగంలోకి దింపి చిరు వ్యాపారులకు రుణాలు ఇప్పిస్తున్నామని ముఖ్యమంత్రి వివరించారు. 3 లక్షల70 వేల 458 మంది చిరువ్యాపారులకి 370 కోట్లు రుణాలు ఇస్తున్నామన్న జగన్... గ్రామాలు పట్టణాల్లో తాత్కాలిక షాపులు ఏర్పాటు చేసుకున్న వారికి సాయం చేస్తున్నట్లు తెలిపారు. సుమారు పది అడుగుల పొడవు, పది అడుగుల వెడల్పు, అంతకంటే ఎక్కువ స్థలంలో దుకాణాలు ఉన్నవారికి, ఫుట్​పాత్, తోపుడు బండ్లపై వస్తువులు, కూరగాయలు అమ్మేవారికి ఆర్థిక సాయం అందుతుందన్నారు. టిఫిన్ సెంటర్లు, గంపలు, బుట్టల్లో వస్తువులు అమ్మేవారికి, సైకిల్, మోటార్ సైకిళ్లు, ఆటోలపై వెళ్లి వ్యాపారం చేసుకునే వారికి ఆర్థిక సాయం చేస్తామన్నారు.

చేనేత, సాంప్రదాయ చేతి వృత్తులు కళాకారులు, ఇత్తడి పని చేసేవారు, బొబ్బిలి వీణ, ఏటి కొప్పాక, కొండపల్లి బొమ్మలు, కలంకారీ, తోలు బొమ్మలు, ఇతర సామాగ్రీ తయారు చేసేవారు, కుమ్మరి, లేస్ వర్క్ తదితర వృత్తులపై ఆధారపడే వారికి జగన్న తోడు కింద సాయం చేస్తున్నట్లు సీఎం జగన్ తెలిపారు. పథకం ద్వారా లబ్ధిపొందిన వారు సకాలంలో బ్యాంకులకు రుణాలు చెల్లిస్తే వడ్డీని ప్రభుత్వం చెల్లిస్తుందన్నారు. చెల్లించిన వడ్డీని నేరుగా వారి బ్యాంకు ఖాతాల్లో ప్రభుత్వం జమచేస్తుందన్నారు. రుణం తీరిన తర్వాత తిరిగి వడ్డీ లేని రుణం తీసుకోవచ్చన్నారు.

సకాలంలో చెల్లింపులు వల్ల ఆర్థిక క్రమశిక్షణ వస్తుందని ముఖ్యమంత్రి జగన్ వివరించారు. 9 లక్షల 5 వేల 458 మందికి 905 కోట్ల వడ్డీ లేని రుణాలు అందిస్తున్నట్లు సీఎం వివరించారు. గతంలో తొలివిడతలో ఇచ్చిన 535 కోట్ల రూపాయల రుణాలకు సంబంధించి వడ్డీ ప్రభుత్వం ఇవాళ, రేపు లబ్ధిదారుల ఖాతాల్లోకి జమచేస్తుందన్నారు. అర్హత ఉండి రుణం రాకపోతే ఎవరూ ఆందోళన పడవద్దన్న సీఎం.. గ్రామ సచివాలయానికి వెళ్లిదరఖాస్తు చేసుకోవాలని సూచించారు. తనిఖీ చేసి అర్హత ఉంటే రుణం మంజూరు చేస్తారన్నారు. ఏదైనా సహాయం, ఫిర్యాదు చేయాలంటే 1902కు ఫోన్ చేయాలని సూచించారు.

చిరువ్యాపారులకు 10వేలు రుణఇవ్వడమనేది నిరంతర ప్రక్రియని, రివాల్వింగ్‌ పద్ధతిలో అందుబాటులో ఉంటుందని సీఎం స్పష్టం చేశారు. ప్రతి ఆరు నెలలకు ఓసారి రుణం మంజూరు చేస్తారన్నారు. పేదల జీవితాలను మార్చేందుకు ఈ రుణం ఎంతగానో ఉపయోగపడుతుందని భావిస్తున్నట్లు తెలిపారు. రుణం తీరగానే.. మళ్లీ వడ్డీలేని రుణాలు వస్తాయని ఈ అవకాశాన్ని సద్వినియోగం చేసుకోవాలని ముఖ్యమంత్రి జగన్ కోరారు.

ఇదీ చదవండి:CM Jagan Letter to PM Modi: 'పీఎంఏవై కింద రాష్ట్రాలకు నిధులివ్వండి'