Robbery at Nadikudi Junction: నడికుడి రైల్వేస్టేషన్‌లో దోపిడీ..రూ.89 లక్షలు ఎత్తుకెళ్లిన దొంగలు

Theft at Nadikude Jn: నడికూడి రైల్వే జంక్షన్‌లో దోపిడీ జరిగింది. రైలు ఎక్కేందుకు సిద్దంగా ఉన్న ప్రయాణికులపై దాడి చేసి.. రూ.89 లక్షలు ఎత్తుకెళ్లారు. ఘటనపై బాధితులు రైల్వే పోలీసులకు ఫిర్యాదు చేశారు.

Robbery at Nadikudi Jn: గుంటూరు జిల్లా దాచేపల్లి మండలం నడికూడి రైల్వే జంక్షన్‌లో సినీఫక్కీలో దోపిడీ జరిగింది. సోమవారం రాత్రి రైలు ఎక్కేందుకు ప్లాట్​ఫామ్​లో ఉన్న ప్రయాణికులపై ఆరుగురు దుండగులు దాడి చేసి.. దోపిడీకి పాల్పడ్డారు. రెండు బ్యాగుల్లో ఉన్న రూ.89 లక్షలు ఎత్తుకెళ్లారు.

ఇదీ జరిగింది...

దుర్గి ప్రాంతానికి చెందిన ముగ్గురు వ్యక్తులు చెన్నై వెళ్లడానికి నడికూడి రైల్వేస్టేషన్‌ రెండో ప్లాట్‌ఫాంలో ఎస్‌ 6 బోగీ ఆగే ప్రదేశంలో రైలు కోసం ఎదురు చూస్తున్నారు. అదే సమయంలో గోగులపాడు వెళ్లే రోడ్డు మార్గం నుంచి (రైల్వే ఖాళీ స్థలం) ఆరుగురు గుర్తు తెలియని వ్యక్తులు వారి వద్దకు వచ్చారు. ఆ ముగ్గురు ప్రయాణికులను కొట్టుకుంటూ పోలీసులు పిలుస్తున్నారని దూరంగా బలవంతంగా వారు తీసుకువెళ్లారు. ముగ్గురి దగ్గర ఉన్న రెండు బ్యాగులను లాక్కొని తెల్లకారులో పారిపోయారు. దుండగులు ఎత్తుకెళ్లిన సంచుల్లో రూ.89 లక్షలున్నట్లు సమాచారం.

ఈ నగదు మొత్తాన్ని వ్యాపార పనుల నిమిత్తం ప్రయాణికులు చెన్నై తీసుకెళ్తున్నారు. జరిగిన ఘటనపై రైల్వే పోలీసులకు వారు ఫిర్యాదు చేశారు. దీంతో వారంతా అప్రమత్తమై పల్నాడు ప్రాంతంలోని పలు పోలీసుస్టేషన్లకు సమాచారం ఇచ్చారు. దుండగుల కోసం గాలిస్తున్నారు.

ఇదీ చదవండి :