గుంటూరులో దారుణ హత్యకు గురైన ఎస్సీ యువతి, బీటెక్‌ విద్యార్థిని రమ్య కుటుంబీకులను పరామర్శించి, వివరాలు తెలుసుకునేందుకు వచ్చిన జాతీయ ఎస్సీ కమిషన్కు వినతులు వెల్లువెత్తాయి. రాష్ట్రంలోని పలు ప్రాంతాల నుంచి బాధితులు గుంటూరుకు పోటెత్తారు. తమకు జరిగిన అన్యాయాలపై కమిషన్ సభ్యులకు రాతపూర్వకంగా వినతులు అందజేశారు. దళితులపై అత్యాచారాలు, ఎస్సీ, ఎస్టీ కేసుల విచారణలో జరుగుతున్న జాప్యం, కేసుల విచారణలో కొందరు పోలీసుల వైఖరిని దళిత, గిరిజన, ప్రజా సంఘాలు కమిషన్ దృష్టికి తీసుకెళ్లాయి. పదోన్నతుల్లో అన్యాయాలు, ప్రభుత్వ శాఖలు, వర్శిటీల్లో పేరుకుపోయిన బ్యాక్‌లాగ్‌ ఖాళీలను భర్తీ చేయకుండా ప్రభుత్వం తాత్సారం చేస్తోందని ఎస్‌ఎఫ్‌ఐ, పీడీఎస్‌యూ తదితర విద్యార్థి సంఘాలు వినతులు సమర్పించాయి. రాష్ట్రంలో దళితులపై జరుగుతున్న అన్యాయాలను తెదేపా సహా విపక్షాలు కమిషన్ దృష్టికి తీసుకెళ్లాయి. మరోవైపు కమిషన్ పర్యటనలో వైకాపా నాయకులు హల్‌చల్‌ చేశారు. జై జగన్‌ అంటూ నినాదాలతో హోరెత్తించారు. కమిషన్ కాన్వాయ్‌లోకి వారి వాహనాలు చేరినా పోలీసులు పట్టించుకోకపోవడం విమర్శలకు దారితీసింది. పర్యటనలో భాజపా నాయకులను అడ్డుకోవడంతో వారు సీఎం డౌన్‌డౌన్‌ అంటూ నినాదాలు చేయడంతో రసాభాసగా మారింది.
ఈ నెల 15న గుంటూరులో దారుణ హత్యకు గురైన రమ్య కుటుంబీకులను కలిసేందుకు జాతీయ ఎస్సీ కమిషన్ వైస్‌ ఛైర్మన్ అరుణ్ హల్దర్‌, సభ్యులు డాక్టర్‌ అంజూ బాలా, సుభాష్ పార్ధీ మంగళవారం గుంటూరులోని వారి నివాసానికి వచ్చారు. రమ్య తల్లిదండ్రులు ఎన్‌.జ్యోతి, వెంకటరావులతో సుమారు 20 నిమిషాలకు పైగా మాట్లాడారు. హత్యకు దారి తీసిన పరిస్థితులు, ఘటన అనంతరం ప్రభుత్వం, పోలీసులు స్పందించిన తీరు, ప్రభుత్వ సాయం తదితర అంశాలపై ఆరా తీశారు. కుటుంబానికి అండగా ఉంటామని, నిందితులకు శిక్ష పడేలా చూస్తామని భరోసా ఇచ్చారు. అనంతరం ఆర్‌అండ్‌బీ అతిథి గృహానికి చేరుకుని వివిధ సమస్యలపై దళితుల నుంచి వినతులు స్వీకరించారు. ఈ సందర్భంగా కమిషన్ వైస్‌ ఛైర్మన్ అరుణ్ హల్దర్‌ మాట్లాడుతూ ఆంధ్రప్రదేశ్‌లో దళితులపై జరుగుతున్న అఘాయిత్యాలు, అత్యాచారాలు, హత్యలు, అన్యాయాలకు సంబంధించి తమకు అనేక వినతులు అందాయన్నారు. వాటన్నింటిపై కమిషన్ లోతుగా అధ్యయనం చేస్తుందని చెప్పారు. దళితుల హక్కులు, ప్రయోజనాలకు భంగం కలిగినట్లు తమ పరిశీలనలో గుర్తిస్తే వెంటనే చర్యలు తీసుకోవాలని ప్రభుత్వాన్ని ఆదేశిస్తామన్నారు. అన్యాయాలపై బాధితులకు ప్రభుత్వపరంగా న్యాయం జరగకపోతే నేరుగా కమిషన్‌ను సంప్రదించాలని కోరారు.
పర్యటన రసాభాస
రమ్య హత్యకు గురైన స్థలాన్ని కమిషన్ పరిశీలిస్తుందని షెడ్యూల్‌లో పేర్కొనడంతో భాజపా ఎస్సీ మహిళా మోర్చా నాయకులు అక్కడికి చేరుకున్నారు. పోలీసులు వారి రాకపై అభ్యంతరం వ్యక్తం చేశారు. అక్కడి నుంచి వెళ్లిపోవాలని, కమిషన్ సభ్యులు ఆర్‌అండ్‌బీ అతిథి గృహానికి వస్తారని, అక్కడే కలిసి ఏదైనా చెప్పుకోవాలని సూచించారు. దీంతో భాజపా కార్యకర్తలకు, పోలీసులకు వాగ్వాదం జరిగింది. ఈలోగా కమిషన్ కాన్వాయ్‌ విజయవాడ నుంచి నేరుగా రమ్య ఇంటికి చేరుకుంది. ఆ కాన్వాయ్‌లో వైకాపాకు అనుకూలంగా వ్యవహరిస్తున్న బోరుగడ్డ అనిల్‌, వారి అనుయాయులు ఉన్నారని, వారిని పంపి తమను ఎలా అడ్డుకుంటారని భాజపా మహిళా నేతలు పోలీసులతో వాగ్వాదానికి దిగారు. అయినా వారిని రమ్య నివాసానికి రాకుండా పోలీసు రోప్‌ పార్టీ అడ్డుకోవడంతో మహిళలు రహదారిపై బైఠాయించారు. ఇదే సమయంలో బోరుగడ్డ అనిల్‌ వారి వద్దకు చేరుకుని జై జగన్‌, దళిత వ్యతిరేకి చంద్రబాబు అంటూ రెచ్చగొట్టే నినాదాలిచ్చారు. దీంతో వారిని ఎలా అనుమతించారు? తమను అడ్డుకోవడం ఏమిటని చెప్పి పోలీసు రోప్‌ పార్టీని తోసుకుని వచ్చేందుకు ప్రయత్నించారు. ఈ క్రమంలో తోపులాట జరిగి భాజపా రాష్ట్ర కార్యదర్శి యామిని శర్మతో పాటు నళిని అనే నాయకురాలు కింద పడిపోయారు. నళిని పది నిమిషాల తర్వాత కూడా స్పృహలోకి రాకపోవడంతో ఆమెను ప్రైవేటు వైద్యశాలకు తరలించి ప్రాథమిక వైద్యం అందించారు.
ఆహ్వానించిన మమ్మల్నే అడ్డుకున్నారు: భాజపా