ముఖ్యమంత్రి జగన్‌ వచ్చారు.. వెళ్లారు. కానీ పోలవరం నిర్వాసితుల సమస్యకు పరిష్కారం దొరకలేదు. వరదలతో తలకిందులైన తమ బతుకులు చూసైనా ముఖ్యమంత్రి మనసు చలిస్తుందని ఆశించారు. కానీ ఆయన కేంద్రపైనే భారం వేశారు. +41.15 కాంటూరు పరిధిలోని గ్రామాలకు సెప్టెంబరు నెలాఖరులోగా పరిహారం ఇస్తామని, +45.72 కాంటూరు పరిధిలోని గ్రామాలకు పరిహారంపై కేంద్రంతో మాట్లాడతామని సీఎం జగన్‌ తెలిపారు. ‘వెయ్యి, 2 వేల కోట్లయితే ఏదోలా సర్దుకునేవాడిని.. ఏకంగా రూ.20వేల కోట్లు అవసరం కాబట్టి కేంద్ర సహాయం తప్పక తీసుకోవాల్సిందే. పెద్ద మనసుతో అర్థం చేసుకోండి’ అంటూ నిర్వాసితులను అభ్యర్థించారు. +41.15 కాంటూరు పునరావాసంపై అధికారులు మొదటి నుంచీ సెప్టెంబరు నెలాఖరును డెడ్‌లైన్‌గా చెబుతున్నారు. ముఖ్యమంత్రీ అదే పునరుద్ఘాటించారు. +41.15 కాంటూరుకు సెప్టెంబరులోగా ఇస్తామని తెలిపారంటే, +45.72 కాంటూరు వాసులు మరికొన్నేళ్ల పాటు వరదలను భరించాల్సిందేనని చెప్పకనే చెప్పినట్లయింది.
+41.15 అంటే పెద్దగా ప్రయోజనం లేదు
ప్రస్తుతానికి +41.15 కాంటూరు పరిధికే పరిహారమన్న ముఖ్యమంత్రి మాటలు నిర్వాసితులకు పెద్దగా రుచించలేదు. ఆ కాంటూరులో పునరావాసం పొందే గ్రామాలు చాలా తక్కువ. అల్లూరి సీతారామరాజు జిల్లా కూనవరం మండలంలో 16 గ్రామ పంచాయతీలు ఉండగా, వరదలు అన్ని పంచాయతీలను ముంచేశాయి. కానీ, ఈ మండలంలో +41.15 కాంటూరు స్థాయిలో ఉన్నది ఒకే ఒక్క గ్రామం. మిగతా గ్రామాలన్నీ +45.72 కాంటూరులో ఉన్నాయి. ఏలూరు జిల్లా కుక్కునూరు మండలానిదీ అదే పరిస్థితి. ఈ మండలంలో 15 గ్రామ పంచాయతీలు ఉండగా అవన్నీ ఇటీవల వరదలకు నష్టపోయినట్లు అధికారులు గుర్తించారు. ఆ మండలంలో +41.15 కాంటూరు పరిధిలో ఉన్నవి 8 గ్రామాలే!