YS Vijayamma Resignation: గుంటూరు జిల్లా చినకాకానిలో జరుగుతున్న వైకాపా ప్లీనరీ వేదికగా.. పార్టీ గౌరవాధ్యక్షురాలు వైఎస్ విజయమ్మ కీలక ప్రకటన చేశారు. గౌరవాధ్యక్ష పదవికి రాజీనామా చేస్తున్నట్లు ప్రకటించారు. విమర్శలకు తావు లేకుండా తాను ఈ పదవి నుంచి తప్పుకుంటున్నట్లు వివరించారు. తెలంగాణలో షర్మిల ఒంటరి పోరాటానికి అండగా ఉండేందుకే ఈ నిర్ణయం తీసుకున్నట్లు తెలిపారు.
విమర్శలకు తావు లేకుండా ఉండేందుకే పార్టీ నుంచి తప్పుకుంటున్నా. తెలంగాణలో షర్మిలకు అండగా ఉండేందుకే రాజీనామా. షర్మిల ఒంటరి పోరాటానికి అండగా ఉండేందుకే ఈ నిర్ణయం. కష్టాల్లో ఉన్నప్పుడు నా కొడుకు జగన్‌తో ఉన్నా... సంతోషం ఉన్నప్పుడు కూడా అండగా ఉంటే నా రక్తం పంచుకున్న బిడ్డ షర్మిలకు అన్యాయం చేసినదాన్ని అవుతానేమోనని నా మనస్సాక్షి చెబుతోంది. నా ఉనికి ఎవరికీ వివాదాస్పదం కాకుండా ఉండేందుకే ఈ నిర్ణయం తీసుకున్నా. ఈ విషయంలో నన్ను క్షమించాలి. -వై.ఎస్.విజయమ్మ
ప్రజల గుండెల్లో వైఎస్ రాజశేఖర్ రెడ్డి సజీవంగా ఉన్నారని వైఎస్ విజయమ్మ అన్నారు. తన జీవితం జనంతో ముడిపడి ఉందని వైఎస్ ఎప్పుడూ చెప్పేవారని ఈ సందర్భంగా గుర్తు చేసుకున్నారు.
ఎక్కడైనా అధికారం కోసమే పార్టీలు పుడతాయని.. వైకాపా మాత్రం ప్రజలకు ఇచ్చిన మాట కోసమే పుట్టిందని తెలిపారు. జగన్‌పై అన్యాయంగా, అక్రమంగా కేసులు పెట్టారని.. ఓర్పు, సహనం, ధైర్యంతో జగన్ నిలబడ్డారని పేర్కొన్నారు. పేదలప్రజల కోసం సీఎం జగన్ అనేక పథకాలు తెచ్చారని.. అధికారంలోకి వచ్చిన ఏడాదిలోనే 90 శాతం హామీలు నెరవేర్చారని వివరించారు.
వైఎస్‌ను ప్రేమించిన ప్రతి గుండెకూ నమస్కరిస్తున్నాను. వైకాపాకు అండగా మొదట్నుంచీ ప్రజలు ఉన్నారు. జగన్ అనేక కష్టాలు ఎదుర్కొన్నారు. రాజకీయ వ్యవస్థలు అన్నీ కలిసి జగన్‌పై దాడి చేశాయి. జగన్‌పై అన్యాయంగా, అక్రమంగా కేసులు పెట్టారు. మా కుటుంబం ఎన్నో కష్టాలు, నిందలు భరించింది. ప్రజల సంక్షేమం, అభివృద్ధి కోసమే వైకాపా పుట్టింది.ఓర్పు, సహనం, ధైర్యంతో జగన్ నిలబడ్డారు. తనను నమ్ముకున్న ప్రజలకు న్యాయం చేయాలనేదే జగన్ తపన. అధికారంలోకి వచ్చిన ఏడాదిలోనే 90 శాతం హామీలు నెరవేర్చారు. పేదలప్రజల కోసం అనేక పథకాలు తెచ్చారు. తెచ్చిన ప్రతి పథకంలోనూ విప్లవం తెచ్చిన ఘనత జగన్‌దే. -వై.ఎస్.విజయమ్మ