కారులో చెలరేగిన మంటలు... తప్పిన ప్రాణనష్టం

జాతీయ రహదారిపై వెళ్తున్న ఓ కారులో అకస్మాత్తుగా మంటలు చెలరేగాయి. వెంటనే అప్రమత్తమైన ప్రయాణికులు సురక్షితంగా బయటపడ్డారు. అగ్నిమాపక సిబ్బంది ఘటనా స్థలానికి చేరుకుని మంటలను ఆర్పివేశారు. కారు పూర్తిగా దగ్ధమైంది.

తెలంగాణలోని హైదరాబాద్-కామారెడ్డి జాతీయ రహదారిపై ఓ కారు దగ్ధమైంది. కామారెడ్డి మండలం క్యాసంపల్లి శివారులో చోటు చేసుకున్న ఈ ఘటనలో ఎలాంటి ప్రాణ నష్టం జరగలేదు. సిద్దిపేట జిల్లా రుద్రారం గ్రామానికి చెందిన స్వామి, సదాశివనగర్ మండల కేంద్రానికి చెందిన శ్రీనివాస్​లు కామారెడ్డి పట్టణంలోని ఓ ప్రైవేట్ ఆస్పత్రిలో తమ బంధువుని పలకరించి కారులో హైదరాబాద్ వైపు బయలుదేరారు.

క్యాసంపల్లి శివారులో కారు నెమ్మది అవడంతో పాటు ఒక్కసారిగా వెనుకబాగం నుంచి మంటలు చెలరేగాయని బాధితులు తెలిపారు. కారులో ప్రయాణిస్తున్న స్వామి, శ్రీనివాస్​లు వెంటనే అప్రమత్తమై బయటకు దిగినట్లు వివరించారు. అగ్నిమాపక సిబ్బంది ఘటనా స్థలానికి చేరుకుని మంటలను ఆర్పివేశారు. కారు పూర్తిగా దగ్ధమైందని పోలీసులు వెల్లడించారు. పెట్రోలింగ్ ఎస్సై ప్రభాకర్ అక్కడికి చేరుకుని వివరాలు సేకరించారు.

ఇదీ చదవండి: