'రైతు ఆత్మహత్యల్లో రాష్ట్రం రెండో స్థానంలో ఉండడం సీఎం జగన్ ఘనతే'

రాష్ట్రంలో రైతుల ఆత్మహత్యలపై తెదేపా నేతలు మండిపడ్డారు. 3వేల కోట్ల రూపాయలతో ధరల స్థిరీకరణ నిధి, 4వేల కోట్లతో విపత్తు సహాయ నిధి హామీలను గాలికి వదిలేశారని యనమల ఆరోపించారు. రైతుద్రోహానికి వైకాపా మూల్యం చెల్లించక తప్పదని హెచ్చరించారు.

రైతు ఆత్మహత్యల్లో రాష్ట్రం రెండో స్థానంలో ఉండడం సీఎం జగన్ ఘనతేనని శాసన మండలి ప్రతిపక్ష నేత యనమల రామకృష్ణుడు ఎద్దేవా చేశారు. వైకాపా ప్రభుత్వం రూ.8 వేల కోట్ల రుణమాఫీని రైతులకు ఎగ్గొట్టిందని ధ్వజమెత్తారు. భరోసా పేరుతో రైతులకు వైకాపా రూ.20వేల కోట్లు మోసం చేశారని ఆరోపించారు. గిట్టుబాటు ధరలు లభించక రూ.15వేల కోట్లు, వైకాపా మోసం వల్ల రూ.20వేల కోట్లు, వరదల్లో పంట నష్టం రూ.15వేల కోట్లు, ఇలా గత 15నెలల్లో మొత్తం రూ.50వేల కోట్లు నష్టపోయారని యనమల వివరించారు.

రైతులకు ఇవ్వాల్సింది ఇవ్వకుండా రావాల్సినవి రద్దు చేశారని విమర్శించారు. రెండు విధాలా రైతులను నష్టాల్లో ముంచి అప్పుల ఊబిలోకి నెట్టారని మండిపడ్డారు. ధాన్యం బకాయిలు రూ.300కోట్లు ఇవ్వకుండా రైతులను వేధిస్తున్నారని ధ్వజమెత్తారు. వేలాది ఎకరాల అసైన్డ్ భూములను బలవంతంగా లాక్కున్నారని దుయ్యబట్టారు. పురుగు మందు డబ్బాలు పట్టుకుని పొలాల్లో తిరిగే దుస్థితి రైతులకు పట్టించారని విమర్శించారు.

జగన్ సీఎం అయ్యాక రైతులకు వెన్నుపోటు పొడిచి.. రైతుభరోసా పథకాన్ని రైతుదగా పథకంగా మార్చారని తెదేపా అధికార ప్రతినిధి కొమ్మారెడ్డి పట్టాభిరామ్‌ ధ్వజమెత్తారు. 2018 తో పోలిస్తే, 2019లో రైతు ఆత్మహత్యలు 35.4 శాతం పెరిగాయని మండిపడ్డారు. 12 వేల 500 రూపాయలకు బదులు 6 వేల 500 మాత్రమే ఇచ్చి, తడిగుడ్డతో రైతు గొంతు కోసింది జగన్ కాదా అని నిలదీశారు. 15లక్షల మంది కౌలురైతులకు రైతుభరోసా అమలు చేస్తామని చెప్పి వారికి అన్యాయం చేశారని ఆగ్రహం వ్యక్తం చేశారు. కేంద్రం సొమ్ముతో కలిపి మొత్తం 18 వేల 500 వస్తాయని ఆశపడిన రైతును జగన్ ప్రభుత్వం నిండా ముంచిందని ధ్వజమెత్తారు.

ఇదీ చదవండి:పురోగతి లేని భారత్​-చైనా అధికారుల చర్చలు